Gauhar ko jauhari sarraf zar ko dekhte hain

transliterator: thothica

work_id: "0fa79898-d38f-4725-91d2-05e4c28435c9" work_slug: "sheikh-ibrahim-zauq-diwan-e-zauq-0fa798" work_title: "Diwan-E-Zauq" author_name: Sheikh Ibrahim Zauq chapter_number: 17 chapter_title: Gauhar ko jauhari sarraf zar ko dekhte hain chapter_slug: "17-gauhar-ko-jauhari-sarraf-zar-ko-dekhte-hain" variant_id: "b2f8ac67-9772-43fc-82d6-f1e73fb20dcd" content_type: transliteration layout: verse language: Urdu source_language: Urdu language_direction: ltr script: latin word_count: 184 estimated_read_time: 1

Gauhar ko jauhari sarraf zar ko dekhte hain Bashar ke hain jo mubassir bashar ko dekhte hain

Na khoob o zisth na aib-o-hunar ko dekhte hain Yeh cheez kya hai bashar hum bashar ko dekhte hain

Woh dekhein bazm mein pehle kidhar ko dekhte hain Muhabbat aaj tere hum asar ko dekhte hain

Woh apni burrish-e-tegh-e-nazar ko dekhte hain Hum un ko dekhte hain aur jigar ko dekhte hain

Jab apne girya o soz-e-jigar ko dekhte hain Sulagti aag mein hum khushk-o-tar ko dekhte hain

Rafeeq jab mere zakhm-e-jigar ko dekhte hain Toh chara-gar unhein woh chara-gar ko dekhte hain

Na tamtaraaq ko na karr-o-farr ko dekhte hain Hum aadmi ke sifaat o siyar ko dekhte hain

Jo raat khwaab mein us fitna-gar ko dekhte hain Na poochh hum jo qayamat seher ko dekhte hain

Woh roz hum ko guzarta hai jaise eid ka din Kabhi jo shakl tumhari seher ko dekhte hain

Jahan ke aainon se dil ka aaina hai juda Us aaine mein hum aaina-gar ko dekhte hain

Bana ke aaina dekhe hai pehle aaina-gar Hunar-war apne hi aib-o-hunar ko dekhte hain