Dood-e-dil se hai yeh taareeki mere gham-khaane mein

transliterator: thothica

work_id: "0fa79898-d38f-4725-91d2-05e4c28435c9" work_slug: "sheikh-ibrahim-zauq-diwan-e-zauq-0fa798" work_title: "Diwan-E-Zauq" author_name: Sheikh Ibrahim Zauq chapter_number: 15 chapter_title: "Dood-e-dil se hai yeh taareeki mere gham-khaane mein" chapter_slug: "15-dood-e-dil-se-hai-yeh-taareeki-mere-gham-khaane-me" variant_id: "64a69967-c7ec-41a5-a634-6a19c8a1ebd1" content_type: transliteration layout: verse language: Urdu source_language: Urdu language_direction: ltr script: latin word_count: 152 estimated_read_time: 1

Dood-e-dil se hai yeh taareeki mere gham-khaane mein Shama hai ik sozan-e-gum-gashta iss kaashaane mein

Main hoon woh khisht-e-kuhan muddat se iss veeraane mein Barson masjid mein raha barson raha mai-khaane mein

Main woh kaifi hoon ke paani ho toh ban jaaye sharaab Josh-e-kaifiyat se meri khaak ke paimaane mein

Barq-e-khirman-soz daanai hai na-fehmi teri Warna kya kya lehlahaate khet hain har daane mein

Kis nazaakat se hai dekho ittehad-e-husn-o-ishq Zulf waan shaane ne khenchi dard hai yaan shaane mein

Vahshat o na-aashnaai masti o begaangi Ya teri aankhon mein dekhi ya tere deewane mein

Ishq ko nashonuma manzoor hai kab warna sabz Tukhm-e-ashk-e-shama ho khaakistar-e-parwaane mein

Hosh ka daawa hai be-hoshon ko zer-e-aasmaan Khum-nasheen misl-e-falatoon sab hain iss khum-khaane mein

Pattharon mein thokrein khaata hai nahaq sail-e-aab Poocho kya le jaayega aa kar mere gham-khaane mein

Ek patthar poojne ko Shaikh-ji Kaabe gaye Zauq har but qaabil-e-bosa hai iss but-khaane mein