Dikhla na khaal-e-naaf tu ae gul-badan mujhe

transliterator: thothica

work_id: "0fa79898-d38f-4725-91d2-05e4c28435c9" work_slug: "sheikh-ibrahim-zauq-diwan-e-zauq-0fa798" work_title: "Diwan-E-Zauq" author_name: Sheikh Ibrahim Zauq chapter_number: 14 chapter_title: "Dikhla na khaal-e-naaf tu ae gul-badan mujhe" chapter_slug: "14-dikhla-na-khaal-e-naaf-tu-ae-gul-badan-mujhe" variant_id: "b417d529-6d7a-4a6d-a77e-bfbc9b69c38b" content_type: transliteration layout: verse language: Urdu source_language: Urdu language_direction: ltr script: latin word_count: 323 estimated_read_time: 2

Dikhla na khaal-e-naaf tu ae gul-badan mujhe Har laala yaan hai naafa-e-mushk-e-khutan mujhe

Humdum wabaal-e-dosh na kar pairahan mujhe Kaanta sa hai khatakta mera tan badan mujhe

Phirta liye chaman mein hai deewana-pan mujhe Zanjeer-e-paa hai mauj-e-naseem-e-chaman mujhe

Tasbeeh-e-daur-e-bazm mein dekho imam ko Bakhshi hai haq ne zeb-e-sar-e-anjuman mujhe

Ae mere yasmin tere dandaan-e-aabdaar Gulshan mein hain rulaate gul-e-yasmin mujhe

Mehraab-e-Kaaba jab se hai tera kham-e-kamaan Said-e-haram samajhte hain naawak-fagan mujhe

Hai tan mein resha-haaye-naye khushk istikhwaan Kyun kheenchta hai kaanton mein ae zo'f-e-tan mujhe

Ae lab missi ko phenk ke neelam hai kam-baha Yaaqoot de ya de koi la'al-e-Yaman mujhe

Hoon shama ya ke shola khabar kuch nahin magar Faanoos ho raha hai mera pairahan mujhe

Ik sarzameen-e-laala bahaar o khizaan mein hoon Yaksaan hai daagh-e-taaza o daagh-e-kuhan mujhe

Khusrau se tesha bola jo chaatoon na tera khoon Sheerin na hove khoon-e-sar-e-koh-kan mujhe

Rukh par tumhare daam jo daala hai sabze ne Aata nazar hai deeda-e-anqa-dahan mujhe

Yeh dil woh hai ke kar de zameen aasmaan ko khaak Ik dam ko barq de jo pinha pairahan mujhe

Kooche mein tere kaun tha leta bhala khabar Shab chaandni ne aa ke pehnaya kafan mujhe

Dikhlaata aasmaan se hai roo-e-zameen ki sair Ae rashk-e-maah teri jabeen ka shikan mujhe

Rakhta hai chashm-e-lutf pe kis kis adaa ke saath Deta hai jaam saaqi-e-paimaan-shikan mujhe

Hai jazb-e-dil durust to chaah-e-firaaq se Kheenche-gi teri zulf shikan-dar-shikan mujhe

Dikhlaata ik adaa mein hai sau sau tarah banao Iss saada-pan ke saath tera baankpan mujhe

Jaise kuen mein ho koi taara chamak raha Dil soojhta hai yoon teh-e-chaah-e-zaqan mujhe

Aa kar use bhi do kabhi aankhein zara dikha Aankhein dikha raha hai ghazaal-e-Khutan mujhe

Aa ae mere chaman ke hawa mein teri hawa Sehra-e-dil hua hai chaman-dar-chaman mujhe

Ya Rab yeh dil hai ya ke hai aaina-e-nazar Dikhla raha hai sair-o-safar dar watan mujhe

Aaya hoon noor le ke main bazm-e-sukhan mein Zauq Aankhon pe sab bithaaenge ahl-e-sukhan mujhe