Dil-e-naadaan tujhe hua kya hai

transliterator: thothica

work_id: "74ed4c1c-c3d2-47b4-b350-4539659ce0f9" work_slug: "mirza-ghalib-diwan-e-ghalib-74ed4c" work_title: "Diwan-E-Ghalib" author_name: Mirza Ghalib chapter_number: 36 chapter_title: "Dil-e-naadaan tujhe hua kya hai" chapter_slug: "36-dil-e-naadaan-tujhe-hua-kya-hai" variant_id: "0721304c-592a-4cb8-95bf-28fb564a5877" content_type: transliteration layout: verse language: Urdu source_language: Urdu language_direction: ltr script: latin word_count: 129 estimated_read_time: 1

Dil-e-naadaan tujhe hua kya hai Aakhir is dard ki dawa kya hai

Hum hain mushtaaq aur woh bezaar Ya Ilaahi yeh maajra kya hai

Main bhi munh mein zabaan rakhta hoon Kaash poochho ke mudda'a kya hai

Jab ke tujh bin nahin koi maujood Phir yeh hangaama, ae Khuda, kya hai

Yeh pari-chehra log kaise hain Ghamza-o-ishwa-o-adaa kya hai

Shikan-e-zulf-e-ambareen kyun hai Nigah-e-chashm-e-surma sa kya hai

Sabza-o-gul kahan se aaye hain Abr kya cheez hai, hawa kya hai

Hum ko un se wafa ki hai ummeed Jo nahin jaante wafa kya hai

Haan bhala kar tera bhala hoga Aur darvesh ki sada kya hai

Jaan tum par nisaar karta hoon Main nahin jaanta dua kya hai

Maine maana ke kuchh nahin 'Ghalib' Muft haath aaye toh bura kya hai