Diya hai dil agar uss ko, bashar hai kya kahiye

transliterator: thothica

work_id: "74ed4c1c-c3d2-47b4-b350-4539659ce0f9" work_slug: "mirza-ghalib-diwan-e-ghalib-74ed4c" work_title: "Diwan-E-Ghalib" author_name: Mirza Ghalib chapter_number: 37 chapter_title: Diya hai dil agar uss ko, bashar hai kya kahiye chapter_slug: "37-diya-hai-dil-agar-uss-ko-bashar-hai-kya-kahiye" variant_id: "12840b69-6f57-4444-9de7-a2294968783d" content_type: transliteration layout: verse language: Urdu source_language: Urdu language_direction: ltr script: latin word_count: 148 estimated_read_time: 1

Diya hai dil agar uss ko, bashar hai kya kahiye Hua raqeeb to ho, naama-bar hai kya kahiye

Yeh zid ke aaj na aave aur aaye bin na rahe Qaza se shikwa hamein kis qadar hai, kya kahiye

Rahe hai yun gah-o-be-gah ke koo-e-dost ko ab Agar na kahiye ke dushman ka ghar hai, kya kahiye

Zahe karishma ke yun de rakha hai hum ko fareb Ke bin kahe hi unhein sab khabar hai, kya kahiye

Samajh ke karte hain bazaar mein woh pursish-e-haal Ke yeh kahe ke sar-e-rahguzar hai, kya kahiye

Tumhein nahin hai sar-rishta-e-wafa ka khayal Hamare haath mein kuch hai, magar hai kya kahiye

Unhein sawaal pe zaum-e-junoon hai, kyun lariye Hamein jawaab se qata-e-nazar hai, kya kahiye

Hasad saza-e-kamal-e-sukhan hai, kya kijiye Sitam baha-e-mata-e-hunar hai, kya kahiye

Kaha hai kis ne ke Ghalib bura nahin lekin Siwaaye is ke ke aashifta-sar hai, kya kahiye