Dar-khur-e-qahr-o-ghazab jab koi hum sa na hua

transliterator: thothica

work_id: "74ed4c1c-c3d2-47b4-b350-4539659ce0f9" work_slug: "mirza-ghalib-diwan-e-ghalib-74ed4c" work_title: "Diwan-E-Ghalib" author_name: Mirza Ghalib chapter_number: 25 chapter_title: "Dar-khur-e-qahr-o-ghazab jab koi hum sa na hua" chapter_slug: "25-dar-khur-e-qahr-o-ghazab-jab-koi-hum-sa-na-hua" variant_id: "bdefd1c4-430d-4600-a988-2aebd4e43974" content_type: transliteration layout: verse language: Urdu source_language: Urdu language_direction: ltr script: latin word_count: 153 estimated_read_time: 1

Dar-khur-e-qahr-o-ghazab jab koi hum sa na hua Phir ghalat kya hai ke hum sa koi paida na hua

Bandagi mein bhi woh azaada o khudbeen hain ke hum Ulte phir aaye dar-e-Kaaba agar waa na hua

Sab ko maqbool hai daawa teri yaktaai ka Ru-ba-ru koi but-e-aaina-seema na hua

Kam nahin naazish-e-ham-naami-e-chashm-e-khoobaan Tera beemar bura kya hai gar achha na hua

Seene ka daagh hai woh naala ke lab tak na gaya Khaak ka rizq hai woh qatra ke dariya na hua

Naam ka mere hai jo dukh ke kisi ko na mila Kaam mein mere hai jo fitna ke barpa na hua

Har bun-e-moo se dam-e-zikr na tapke khoon-e-naab Hamza ka qissa hua, ishq ka charcha na hua

Qatre mein Dajla dikhaai na de aur juzv mein kul Khel ladkon ka hua, deeda-e-beena na hua

Thi khabar garm ke Ghalib ke udenge purze Dekhne hum bhi gaye the, pe tamasha na hua