raha gar koi ta-qayamat salamat

transliterator: thothica

work_id: "74ed4c1c-c3d2-47b4-b350-4539659ce0f9" work_slug: "mirza-ghalib-diwan-e-ghalib-74ed4c" work_title: "Diwan-E-Ghalib" author_name: Mirza Ghalib chapter_number: 229 chapter_title: "raha gar koi ta-qayamat salamat" chapter_slug: "229-raha-gar-koi-ta-qayamat-salamat" variant_id: "46c52981-e189-4e0f-9b1d-853699a122f0" content_type: transliteration layout: verse language: Urdu source_language: Urdu language_direction: ltr script: latin word_count: 78 estimated_read_time: 1

raha gar koi ta-qayamat salamat phir ik roz marna hai hazrat-salamat

jigar ko mere ishq-e-khoon-naaba-mashrab likhe hai khudawand-e-nemat salamat

ala-ar-raghm-e-dushman shaheed-e-wafa hoon mubarak mubarak salamat salamat

nahin gar sar-o-barg-e-idraak-e-maani tamasha-e-nairang-e-soorat salamat

do-aalam ki hasti pe khat-e-fana kheench dil-o-dast-e-arbab-e-himmat salamat

nahin gar ba-kaam-e-dil-e-khasta gardoon jigar-khai-e-josh-e-hasrat salamat

na auron ki sunta na kehta hoon apni sar-e-khasta dushwar-e-wehshat salamat

wufoor-e-bala hai hujoom-e-wafa hai salamat malamat malamat salamat

na fikr-e-salamat na beem-e-malamat ze-khud-raftagi-haaye-hairat salamat

rahe Ghalib-e-khasta maghloob-e-gardoon yeh kya be-niyazi hai hazrat-salamat