pa-ba-daaman ho raha hoon baske main sahra-navard

transliterator: thothica

work_id: "74ed4c1c-c3d2-47b4-b350-4539659ce0f9" work_slug: "mirza-ghalib-diwan-e-ghalib-74ed4c" work_title: "Diwan-E-Ghalib" author_name: Mirza Ghalib chapter_number: 228 chapter_title: "pa-ba-daaman ho raha hoon baske main sahra-navard" chapter_slug: "228-pa-ba-daaman-ho-raha-hoon-baske-main-sahra-navard" variant_id: "2fcb4b99-9cbd-4f21-8643-11b91b5877dc" content_type: transliteration layout: verse language: Urdu source_language: Urdu language_direction: ltr script: latin word_count: 123 estimated_read_time: 1

pa-ba-daaman ho raha hoon baske main sahra-navard khaar-e-pa hain jauhar-e-aaina-e-zaanu mujhe

dekhna haalat mere dil ki ham-aaghoshi ke waqt hai nigaah-aashna tera sar-e-har-moo mujhe

hoon saraapa saaz-e-aahang-e-shikayat kuchh na poochh hai yahi behtar ke logon mein na chhede tu mujhe

baais-e-waamaandagi hai umr-e-fursat-jo mujhe kar diya hai pa-ba-zanjeer-e-ram-e-aahu mujhe

khaak-e-fursat bar-sar-e-zauq-e-fana ae intezaar hai ghubaar-e-sheesha-e-sa'at ram-e-aahu mujhe

ham-zubaan aaya nazar fikr-e-sukhan mein tu mujhe mardumak hai toti-e-aaina-e-zaanu mujhe

yaad-e-mizhgaan mein ba-nishtar-zaar-e-sauda-e-khayaal chaahiye waqt-e-tapish yak-dast sad-pehlu mujhe

iztiraab-e-umr be-matlab nahin aakhir ke hai justujoo-e-fursat-e-rabt-e-sar-e-zaanu mujhe

chaahiye darmaan-e-resh-e-dil bhi tegh-e-yaar se marham-e-zangaar hai woh wasma-e-abru mujhe

kasrat-e-jaur-o-sitam se ho gaya hoon be-dimaagh khoob-ruyon ne banaaya Ghalib-e-bad-khoo mujhe

fursat-e-aaraam-e-ghash hasti hai bohraan-e-adam hai shikast-e-rang-e-imkaan gardish-e-pehlu mujhe

saaz-e-eema-e-fana hai aalam-e-peeri Asad qaamat-e-kham se hai haasil shokhi-e-abru mujhe