saadgi par us ki mar jaane ki hasrat dil mein hai

transliterator: thothica

work_id: "74ed4c1c-c3d2-47b4-b350-4539659ce0f9" work_slug: "mirza-ghalib-diwan-e-ghalib-74ed4c" work_title: "Diwan-E-Ghalib" author_name: Mirza Ghalib chapter_number: 230 chapter_title: saadgi par us ki mar jaane ki hasrat dil mein hai chapter_slug: "230-saadgi-par-us-ki-mar-jaane-ki-hasrat-dil-mein-hai" variant_id: "2ceb3f17-bdeb-4c0d-98ee-7a54d0e73387" content_type: transliteration layout: verse language: Urdu source_language: Urdu language_direction: ltr script: latin word_count: 113 estimated_read_time: 1

saadgi par us ki mar jaane ki hasrat dil mein hai bas nahin chalta ke phir khanjar kaf-e-qatil mein hai

dekhna taqreer ki lazzat ke jo us ne kaha main ne yeh jaana ke goya yeh bhi mere dil mein hai

garchay hai kis kis buraai se walay ba-in-hama zikr mera mujh se behtar hai ke us mehfil mein hai

bas hujoom-e-na-umeedi khaak mein mil jaayegi yeh jo ik lazzat hamari sa'i-e-be-hasil mein hai

ranj-e-rah kyun kheenchiye waamandagi ko ishq hai uth nahin sakta hamara jo qadam manzil mein hai

jalwa-zaar-e-aatish-e-dozakh hamara dil sahi fitna-e-shor-e-qiyamat kis ke aab-o-gul mein hai

hai dil-e-shoreeda-e-Ghalib tilism-e-pech-o-taab rehm kar apni tamanna par ke kis mushkil mein hai