Majnoon ne sheher chhora to sehra bhi chhor de

transliterator: thothica

work_id: "55b25cac-46ff-446c-bfe7-0ae5b8541ad8" work_slug: "allama-iqbal-bang-e-dara-part-1-55b25c" work_title: "Bang-E-Dara Part 1" author_name: Allama Iqbal chapter_number: 9 chapter_title: Majnoon ne sheher chhora to sehra bhi chhor de chapter_slug: "09-majnoon-ne-sheher-chhora-to-sehra-bhi-chhor-de" variant_id: "c6976688-6193-4e36-b286-551d536e54ad" content_type: transliteration layout: verse language: Urdu source_language: Urdu language_direction: ltr script: latin word_count: 210 estimated_read_time: 1

Majnoon ne sheher chhora to sehra bhi chhor de Nazzare ki hawas ho to Laila bhi chhor de Waaiz! kamaal-e-tark se milti hai yaan muraad Duniya jo chhor di hai to uqba bhi chhor de Taqleed ki rawish se to behtar hai khudkushi Rasta bhi dhoondh, Khizr ka sauda bhi chhor de Maanind khaama teri zubaan par hai harf-e-ghair Begaana shay pe naazish-e-beja bhi chhor de Lutf kalaam kya jo na ho dil mein dard-e-ishq Bismil nahin hai to tu tadapna bhi chhor de Shabnam ki tarah phoolon pe ro, aur chaman se chal Is baagh mein qayaam ka sauda bhi chhor de Hai aashiqi mein rasm alag sab se baithna But khaana bhi, Haram bhi, Kaleesa bhi chhor de Saudagari nahin, yeh ibaadat Khuda ki hai Aye be-khabar! jaza ki tamanna bhi chhor de Achha hai dil ke saath rahe paasbaan-e-aql Lekin kabhi kabhi usey tanha bhi chhor de Jeena woh kya jo ho nafs-e-ghair par madaar Shohrat ki zindagi ka bharosa bhi chhor de Shokhi si hai sawaal-e-mukarrar mein aye Kaleem ! Shart raza yeh hai ke taqaaza bhi chhor de Waaiz saboot laaye jo mai ke jawaaz mein Iqbal ko yeh zid hai ke peena bhi chhor de