Chapter 30

Vi_30

śrāvaṇyāṃ prauṣṭhapadyāṃ vā chandāṃsy upākṛtyārdhapañcamān māsān adhīyīta // Vi_30.1 //

tatas teṣām utsargaṃ bahiḥ kuryāt // Vi_30.2 //

utsarjanopākarmaṇor madhye vedāṅgādhyayanaṃ kuryāt // Vi_30.3 //

nādhīyītāhorātraṃ caturdaśyaṣṭamīṣu ca // Vi_30.4 //

na+ṛtvantaragrahasūtake // Vi_30.5 //

nendraprayāṇe // Vi_30.6 //

na vāti caṇḍapavane // Vi_30.7 //

nākālavarṣavidyutstaniteṣu // Vi_30.8 //

na bhūkaṃpolkāpātadigdāheṣu // Vi_30.9 //

nāntaḥśave grāme // Vi_30.10 //

na śāstrasaṃpāte // Vi_30.11 //

na śvasṛgālagardabhanirhrādeṣu // Vi_30.12 //

na vāditraśabde // Vi_30.13 //

na śūdrapatitayoḥ samīpe // Vi_30.14 //

na devatāyatanaśmaśānacatuṣpatharathyāsu // Vi_30.15 //

nodakāntaḥ // Vi_30.16 //

na pīṭhopahitapādaḥ // Vi_30.17 //

na hastyaśvoṣṭranaugoyāneṣu // Vi_30.18 //

na vāntaḥ // Vi_30.19 //

na viriktaḥ // Vi_30.20 //

nājīrṇī // Vi_30.21 //

na pañcanakhāntarāgamane // Vi_30.22 //

na rājaśrotriyagobrāhmaṇavyasane // Vi_30.23 //

nopākarmaṇi // Vi_30.24 //

notsarge // Vi_30.25 //

na sāmadhvanāv ṛgyajuṣī // Vi_30.26 //

nāpararātram adhītya śayīta // Vi_30.27 //

abhiyukto 'py anadhyāyeṣv adhyayanaṃ pariharet // Vi_30.28 //

yasmād anadhyāyādhītaṃ nehāmutra phalapradam // Vi_30.29 //

tadadhyayanenāyuṣaḥ kṣayo guruśiṣyayoś ca // Vi_30.30 //

tasmād anadhyāyavarjaṃ guruṇā brahmalokakāmena vidyā satśiṣyakṣetreṣu vaptavyā // Vi_30.31 //

śiṣyeṇa brahmārambhāvasānayor guroḥ pādopasaṃgrahaṇaṃ kāryam // Vi_30.32 //

praṇavaś ca vyāhartavyaḥ // Vi_30.33 //

tatra ca yad ṛco 'dhīte tenāsyājyena pitṝṇāṃ tṛptir bhavati // Vi_30.34 //

yad yajūṃṣi tena madhunā // Vi_30.35 //

yat sāmāni tena payasā // Vi_30.36 //

yad ātharvaṇaṃ tena māṃsena // Vi_30.37 //

yat purāṇetihāsavedāṅgadharmaśāstrāṇy adhīte tenāsyānnena // Vi_30.38 //

yaś ca vidyām āsādyāsmin loke tayā jīvet, na sā tasya paraloke phalapradā bhavet // Vi_30.39 //

yaś ca vidyayā yaśaḥ pareṣāṃ hanti // Vi_30.40 //

ananujñātaś cānyasmād adhīyānān na vidyām ādadyāt // Vi_30.41 //

tadādānam asya brahmasteyaṃ narakāya bhavati // Vi_30.42 //

laukikaṃ vaidikaṃ vāpi tathādhyātmikam eva vā /

ādadīta yato jñānaṃ na taṃ druhyet kadācana || Vi_30.43 ||

utpādakabrahmadātror garīyān brahmadaḥ pitā /

brahmajanma hi viprasya pretya ceha ca śāśvatam || Vi_30.44 ||

kāmān mātā pitā cainaṃ yad utpādayato mithaḥ /

saṃbhūtiṃ tasya tāṃ vidyād yad yonāv iha jāyate || Vi_30.45 ||

ācāryas tv asya yāṃ jātiṃ vidhivad vedapāragaḥ /

utpādayati sāvitryā sā satyā sājarāmarā || Vi_30.46 ||

ya āvṛṇoty avitathena karṇāv aduḥkhaṃ kurvann amṛtaṃ saṃprayacchan /

taṃ manyeta pitaraṃ mātaraṃ ca tasmai na druhyet kṛtam asya jānan || Vi_30.47 ||