Chapter 29

Vi_29

yas tūpanīya vratādeśaṃ kṛtvā vedam adhyāpayet tam ācāryaṃ vidyāt // Vi_29.1 //

yas tv enaṃ mūlyenādhyāpayet tam upādhyāyam ekadeśaṃ vā // Vi_29.2 //

yo yasya yajñnakarmāṇi kuryāt tam ṛtvijaṃ vidyāt // Vi_29.3 //

nāparīkṣitaṃ yojayet // Vi_29.4 //

nādhyāpayet // Vi_29.5 //

nopanayet // Vi_29.6 //

adharmeṇa ca yaḥ prāha yaś cādharmeṇa pṛcchati /

tayor anyataraḥ praiti vidveṣaṃ vādhigacchati || Vi_29.7 ||

dharmārthau yatra na syātāṃ śuśrūṣā vāpi tadvidhā /

tatra vidyā na vaktavyā śubhaṃ bījam ivoṣare || Vi_29.8 ||

vidyā ha vai brahmaṇam ājagāma gopāya mā śevadhiṣṭe 'ham asti /

asūyakāyānṛjave 'yatāya na māṃ brūyā avīryavatī tathā syām || Vi_29.9 ||

yam eva vidyāḥ śucim apramattaṃ medhāvinaṃ brahmacaryopapannam /

yas te na druhyet katamac ca nāha tasmai māṃ brūyā nidhipāya brahman || Vi_29.10 ||