Chapter 28

Vi_28

atha brahmacariṇāṃ gurukulavāsaḥ // Vi_28.1 //

saṃdhyādvayopāsanam // Vi_28.2 //

pūrvāṃ saṃdhyāṃ japet tiṣṭhan paścimām āsīnaḥ // Vi_28.3 //

kāladvayam abhiṣekāgnikarmakaraṇam // Vi_28.4 //

apsu daṇḍavan majjanam // Vi_28.5 //

āhūtādhyayanam // Vi_28.6 //

guroḥ priyahitācaraṇam // Vi_28.7 //

mekhalādaṇḍājinopavītadhāraṇam // Vi_28.8 //

gurukulavarjaṃ guṇavatsu bhaikṣyacaraṇam // Vi_28.9 //

gurvanujñātaṃ bhaikṣyābhyavaharaṇam // Vi_28.10 //

śrāddhakṛtalavaṇaśuktaparyuṣitanṛtyagītastrīmadhumāṃsāñjanocchiṣṭaprāṇihiṃsāślīlaparivarjanam // Vi_28.11 //

adhaḥ śayyā // Vi_28.12 //

guroḥ pūrvotthānaṃ caramaṃ saṃveśanam // Vi_28.13 //

kṛtasaṃdhyopāsanaś ca gurvabhivādanaṃ kuryāt // Vi_28.14 //

tasya ca vyatyastakaraḥ pādāv upaspṛśet // Vi_28.15 //

dakṣiṇaṃ dakṣiṇenetaram itareṇa // Vi_28.16 //

svaṃ ca nāmāsyābhivādanānte bhoḥśabdāntaṃ nivedayet // Vi_28.17 //

tiṣṭhann āsīnaḥ śayāno bhuñjānaḥ parāṅmukhaś ca nāsyābhibhāṣaṇaṃ kuryāt // Vi_28.18 //

āsīnasya sthitaḥ kuryād abhigacchaṃs tu gacchataḥ / āgacchataḥ pratyudgamya paścād dhāvaṃs tu dhāvataḥ // Vi_28.19 //

parāṅmukhasyābhimukhaḥ // Vi_28.20 //

dūrasthasyāntikam upetya // Vi_28.21 //

śayānasya praṇamya // Vi_28.22 //

tasya ca cakṣurviṣaye na yatheṣṭāsanaḥ syāt // Vi_28.23 //

na cāsya kevalaṃ nāma brūyāt // Vi_28.24 //

gaticeṣṭābhāṣitādyaṃ nāsyānukuryāt // Vi_28.25 //

yatrāsya nindāparivādau syātāṃ na tatra tiṣṭhet // Vi_28.26 //

nāsyaikāsano bhavet // Vi_28.27 //

ṛte śilāphalakanauyānebhyaḥ // Vi_28.28 //

guror gurau saṃnihite guruvad varteta // Vi_28.29 //

anirdiṣṭaś ca guruṇā svān gurun nābhivādayet // Vi_28.30 //

bāle samānavayasi vādhyāpake guruputre guruvad varteta // Vi_28.31 //

nāsya pādau prakṣālayet // Vi_28.32 //

nocchiṣṭam aśnīyāt // Vi_28.33 //

evaṃ vedaṃ vedau vedān vā svīkuryāt // Vi_28.34 //

tato vedāṅgāni // Vi_28.35 //

yas tv anadhītavedo 'nyatra śramaṃ kuryād asau sasaṃtānaḥ śūdratvam eti // Vi_28.36 //

mātur agre vijananaṃ dvitīyaṃ mauñjibandhanam // Vi_28.37 //

tatrāsya mātā sāvitrī bhavati pitā tv *ācāryaḥ [ācārthaḥ] // Vi_28.38 //

etenaiva teṣāṃ dvijatvam // Vi_28.39 //

prāṅ mauñjībandhanād dvijaḥ śūdrasamo bhavati // Vi_28.40 //

brahmacāriṇā muṇḍena jaṭilena vā bhāvyam // Vi_28.41 //

vedasvīkaraṇād ūrdhvaṃ gurvanujñātas tasmai varaṃ dattvā snāyāt // Vi_28.42 //

tato gurukula eva vā janmanaḥ śeṣaṃ nayet // Vi_28.43 //

tatrācārye prete guruvat guruputre varteta // Vi_28.44 //

gurudāreṣu savarṇeṣu vā // Vi_28.45 //

tadabhāve 'gniśuśrūṣur naiṣṭhiko brahmacārī syāt // Vi_28.46 //

evaṃ carati yo vipro brahmacaryam atandritaḥ /

sa gacchaty uttamaṃ sthānaṃ na cehājāyate punaḥ || Vi_28.47 ||

kāmato retasaḥ sekaṃ vratasthasya dvijanmanaḥ /

atikramaṃ vratasyāhur dharmajñā brahmacāriṇaḥ || Vi_28.48 ||

etasminn enasi prāpte vasitvā gardabhājinam /

saptāgāraṃ cared bhaikṣaṃ svakarma parikīrtayan || Vi_28.49 ||

tebhyo labdhena bhaikṣyeṇa vartayann ekakālikam /

upaspṛśaṃs triṣavaṇam abdena sa viśudhyati || Vi_28.50 ||

svapne siktvā brahmacārī dvijaḥ śukram akāmataḥ /

snātvārkam arcayitvā triḥ punar mām ity ṛcaṃ japet || Vi_28.51 ||

akṛtvā bhaikṣacaraṇam asamiddhya ca pāvakam /

anāturaḥ saptarātram avakīrṇivrataṃ caret || Vi_28.52 ||

taṃ ced abhyudiyāt sūryaḥ śayānaṃ kāmakārataḥ /

nimloced vāpy+avijñānāj japann upavased dinam || Vi_28.53 ||