Chapter 27

Vi_27

garbhasya spaṣṭatājñāne niṣekakarma // Vi_27.1 //

spandanāt purā puṃsavanam // Vi_27.2 //

*ṣaṣṭhe 'ṣṭame vā māsi sīmantonnayanam [paṣṭhe] // Vi_27.3 //

jāte ca dārake jātakarma // Vi_27.4 //

āśaucavyapagame nāmadheyam // Vi_27.5 //

maṅgalyaṃ brāhamaṇasya // Vi_27.6 //

balavat kṣatriyasya // Vi_27.7 //

dhanopetaṃ vaiśyasya // Vi_27.8 //

jugupsitaṃ śūdrasya // Vi_27.9 //

caturthe māsy ādityadarśanam // Vi_27.10 //

ṣaṣṭhe 'nnaprāśanam // Vi_27.11 //

tṛtīye 'bde cūḍākaraṇam // Vi_27.12 //

etā eva kriyāḥ strīṇām amantrakāḥ // Vi_27.13 //

tāsāṃ samantrako vivāhaḥ // Vi_27.14 //

garbhāṣṭame 'bde brāhmaṇasyopanayanam // Vi_27.15 //

garbhaikādaśe rājñaḥ // Vi_27.16 //

garbhadvādaśe viśaḥ // Vi_27.17 //

teṣāṃ muñjajyābalbajamayyo mauñjyaḥ // Vi_27.18 //

kārpāsaśāṇāvikāny upavītāni vāsāṃsi ca // Vi_27.19 //

mārgavaiyāghrabāstāni carmāṇi // Vi_27.20 //

pālāśakhādiraudumbarā daṇḍāḥ // Vi_27.21 //

keśāntalalāṭanāsādeśatulyāḥ // Vi_27.22 //

sarva eva vā // Vi_27.23 //

akuṭilāḥ satvacaś ca // Vi_27.24 //

bhavadādyaṃ bhavanmadhyaṃ bhavadantaṃ ca bhaikṣyacaranam // Vi_27.25 //

ā ṣoḍaśād brāhmaṇasya sāvitrī nātivartate /

ā dvāviṃśāt kṣatrabandhor ā caturviṃśater viśaḥ || Vi_27.26 ||

ata ūrdhvaṃ trayo 'py ete yathākālam asaṃskṛtāḥ /

sāvitrīpatitā vrātyā bhavanty āryavigarhitāḥ || Vi_27.27 ||

yady asya vihitaṃ carma yat sūtraṃ yā ca mekhalā /

yo daṇḍo yac ca vasanaṃ tat tad asya vrateṣv api || Vi_27.28 ||

mekhalām ajinaṃ daṇḍam upavītaṃ kamaṇḍalum /

apsu prāsya vinaṣṭāni gṛhṇītānyāni mantravat || Vi_27.29 ||