Chapter 5

vṛkaśvānasṛgālādyair daṣṭo yas tu dvijottamaḥ /

snātvā japet sa gāyatrīṃ pavitrāṃ vedamātaram (II,1, p. 61) // Par_5.1 //

gavāṃ śṛṅgodakaiḥ snānaṃ mahānadyos tu saṃgame /

samudradarśanād vāpi śunā daṣṭaḥ śucir bhavet // Par_5.2 //

vedavidyāvratasnātaḥ śunā daṣṭo dvijo yadi /

sa hiraṇyodakaiḥ snātvā ghṛtaṃ prāśya viśudhyati (II,1, p. 62) // Par_5.3 //

savratas tu śunā daṣṭo yas trirātram upāvaset /

ghṛtaṃ kuśodakaṃ pītvā vrataśeṣaṃ samāpayet // Par_5.4 //

avrataḥ savrato vāpi śunā daṣṭo bhaved dvijaḥ /

praṇipatya bhavet pūto vipraiś cakṣurnirīkṣitaḥ // Par_5.5 //

śunā ghrātāvalīḍhasya nakhair vilikhitasya ca /

adbhiḥ prakṣālanaṃ proktam agninā copacūlanam // Par_5.6 //

śunā tu brāhmaṇī daṣṭā jambukena vṛkeṇa vā /

uditaṃ grahanakṣatraṃ dṛṣṭvā sadyaḥ śucir bhavet // Par_5.7 //

kṛṣṇapakṣe yadā somo na dṛśyeta kadācana /

yāṃ diśaṃ vrajate somas tāṃ diśaṃ vāvalokayet // Par_5.8 //

asadbrāhmaṇake grāme śunā daṣṭo dvijottamaḥ /

vṛṣaṃ pradakṣiṇīkṛtya sadyaḥ snātvā śucir bhavet // Par_5.9 //

caṇḍālena śvapākena gobhir viprair hato yadi /

āhitāgnir mṛto vipro viṣeṇātmahato yadi (II,1, p. 69) // Par_5.10 //

dahet taṃ brāhmaṇaṃ vipro lokāgnau mantravarjitam /

spṛṣṭvā voḍhvā ca dagdhvā ca sapiṇḍeṣu ca sarvathā // Par_5.11 //

prājāpatyaṃ caret paścād viprāṇām anuśāsanāt /

dagdhāsthīni punar gṛhya kṣīraiḥ prakṣālayed dvijaḥ (II,1, p. 70) // Par_5.12 //

punar dahet svāgninā tu svatantreṇa pṛthak pṛthak /

āhitāgnir dvijaḥ kaścit pravasan kālacoditaḥ (II,1, p. 71) // Par_5.13 //

dehanāśam anuprāptas tasyāgnir vasate gṛhe /

pretāgnihotrasaṃskāraḥ śrūyatām ṛṣipuṅgavāḥ // Par_5.14 //

kṛṣṇājinaṃ samāstīrya kuśais tu puruṣākṛtim /

ṣaṭśatāni śataṃ caiva palāśānāṃ ca vṛntataḥ // Par_5.15 //

catvāriṃśac chire dadyāc chataṃ kaṇṭhe tu vinyaset /

bāhubhyāṃ śatakaṃ dadyād aṅgulīṣu daśaiva tu (II,1, p. 72) // Par_5.16 //

śataṃ tu jaghane dadyād dviśataṃ tūdare tathā /

dadyād aṣṭau vṛṣaṇayoḥ pañca medhre tu vinyaset // Par_5.17 //

ekaviṃśatim ūrubhyāṃ dviśataṃ jānujaṅghayoḥ /

pādāṅgulīṣu ṣaḍ dadyād yajñapātraṃ tato nyaset // Par_5.18 //

śamyaṃ śiśne viniḥkṣipya araṇīṃ muṣkayor api /

juhūṃ ca dakṣiṇe haste vāme tūpabhṛtaṃ nyaset // Par_5.19 //

karṇe colūkhalaṃ dadyāt pṛṣṭhe ca musalaṃ nyaset /

urasi kṣipya dṛṣadaṃ taṇḍulājyatilān mukhe // Par_5.20 //

śrotre ca prokṣaṇīṃ dadyād ājyasthalīṃ tu cakṣuṣoḥ /

karṇe netre mukhe ghrāṇe hiraṇyaśakalaṃ nyaset // Par_5.21 //

agnihotropakaraṇam aśeṣaṃ tatra nikṣipet /

asau svargāya lokāya svāhety ekāhutiṃ sakṛt (II,1, p. 73) // Par_5.22 //

dadyāt putro 'thavā bhrātāpy anyo vāpi ca bāndhavaḥ /

yathā dahanasaṃskāras tathā kāryaṃ vicakṣaṇaiḥ // Par_5.23 //

īdṛśaṃ tu vidhiṃ kuryād brahmalokagatiḥ smṛtā /

dahanti ye dvijās taṃ tu te yānti paramāṃ gatim (II,1, p. 74) // Par_5.24 //

anyathā kurvate karma tv ātmabuddhyā pracoditāḥ /

bhavanty alpāyuṣas te vai patanti narake 'śucau // Par_5.25 //