Chapter 4

[Vol. II, Part 1:]

Prāyaścittakāṇḍam

atimānād atikrodhāt snehād vā yadi vā bhayāt /

udbadhnīyāt strī pumān vā gatir eṣā vidhīyate (II,1, p. 18) // Par_4.1 //

pūyaśoṇitasaṃpūrṇe tv andhe tamasi majjati /

ṣaṣṭhīr varṣasahasrāṇi narakaṃ pratipadyate (II,1, p. 19) // Par_4.2 //

nāśaucaṃ nodakaṃ nāgniṃ nāśrupātaṃ ca kārayet /

voḍhāro 'gnipradātāraḥ pāśacchedakarās tathā (II,1, p. 23) // Par_4.3 //

taptakṛcchreṇa śudhyantīty evam āha prajāpatiḥ /

gobhir hataṃ tathodbaddhaṃ brāhmaṇena tu ghātitam (II,1, p. 25) // Par_4.4 //

saṃspṛśanti tu ye viprā voḍhāraś cāgnidāś ca ye /

anye ye vānugantāraḥ pāśacchedakarāś ca ye // Par_4.5 //

taptakṛcchreṇa śuddhās te kuryur brāhmaṇabhojanam /

anaḍutsahitāṃ gāṃ ca dadyur viprāya dakṣiṇām // Par_4.6 //

tryaham uṣṇaṃ pibed vāri tryaham uṣṇaṃ payaḥ pibet /

tryaham uṣṇaṃ pibet sarpir vāyubhakṣo dinatrayam (II,1, p. 26) // Par_4.7 //

ṣaṭpalaṃ tu pibed ambhas tripalaṃ tu payaḥ pibet /

palam ekaṃ pibet sarpis taptakṛcchraṃ vidhīyate // Par_4.8 //

yo vai samācared vipraḥ patitādiṣv akāmataḥ /

pañcāhaṃ vā daśāhaṃ vā dvādaśāham athāpi vā (II,1, p. 27) // Par_4.9 //

māsārdhaṃ māsam ekaṃ vā māsadvayam athāpi vā /

abdārdham abdam ekaṃ vā tad ūrdhvaṃ caiva tatsamaḥ // Par_4.10 //

trirātraṃ prathame pakṣe dvitīye kṛcchram ācaret /

tṛtīye caiva pakṣe tu kṛcchraṃ sāṃtapanaṃ caret (II,1, p. 29) // Par_4.11 //

caturthe daśarātraṃ syāt parākaḥ pañcame mataḥ /

kuryāc cāndrāyaṇaṃ ṣaṣṭhe saptame tv aindavadvayam // Par_4.12 //

śuddhyartham aṣṭame caiva ṣaṇ māsān kṛcchram ācaret /

pakṣasaṃkhyāpramāṇena suvarṇāny api dakṣiṇā (II,1, p. 30) // Par_4.13 //

ṛtusnātā tu yā nārī bhartāraṃ nopasarpati /

sā mṛtā narakaṃ yāti vidhavā ca punaḥ punaḥ (II,1, p. 33) // Par_4.14 //

ṛtusnātāṃ tu yo bhāryāṃ saṃnidhau nopagacchati /

ghorāyāṃ bhrūṇahatyāyāṃ yujyate nātra saṃśayaḥ // Par_4.15 //

daridraṃ vyādhitaṃ mūrkhaṃ bhartāraṃ yāvamanyate /

sā śunī jāyate mṛtvā sūkarī ca punaḥ punaḥ // Par_4.16 //

patyau jīvati yā nārī upoṣya vratam ācaret /

āyuṣyaṃ harate bhartuḥ sā nārī narakaṃ vrajet // Par_4.17 //

apṛṣṭvā caiva bhartāraṃ yā nārī kurute vratam /

sarvaṃ tad rākṣasān gacched ity evaṃ manur abravīt (II,1, p. 34) // Par_4.18 //

bāndhavānāṃ sajātīnāṃ durvṛttaṃ kurute tu yā /

garbhapātaṃ ca yā kuryān na tāṃ saṃbhāṣayet kvacit // Par_4.19 //

yat pāpaṃ brahmahatyāyāṃ dviguṇaṃ garbhapātane /

prāyaścittaṃ na tasyāḥ syāt tasyās tyāgo vidhīyate // Par_4.20 //

na kāryam āvasathyena nāgnihotreṇa vā punaḥ /

sa bhavet karmacāṇḍālo yas tu dharmaparāṅmukhaḥ // Par_4.21 //

oghavātāhṛtaṃ bījaṃ yasya kṣetre prarohati /

sa kṣetrī labhate bījaṃ na bījī bhāgam arhati (II,1, p. 42) // Par_4.22 //

tadvat parastriyāḥ putrau dvau smṛtau kuṇḍagolakau /

patyau jīvati kuṇḍaḥ syāt mṛte bhartari golakaḥ // Par_4.23 //

aurasaḥ kṣetrajaś caiva dattaḥ kṛtrimakaḥ sutaḥ /

dadyān mātā pitā vāpi sa putro dattako bhavet (II,1, p. 48) // Par_4.24 //

parivittiḥ parivettā yayā ca parividyate /

sarve te narakaṃ yānti dātṛyājakapañcamāḥ // Par_4.25 //

dvau kṛcchrau parivittes tu kanyāyāḥ kṛcchra eva ca /

kṛcchrātikṛcchrau dātus tu hotā cāndrāyaṇaṃ caret // Par_4.26 //

kubjavāmanaṣaṇḍheṣu gadgadeṣu jaḍeṣu ca /

jātyandhe badhire mūke na doṣaḥ parivedane (II,1, p. 51) // Par_4.27 //

pitṛvyaputraḥ sāpatnaḥ paranārīsutas tathā /

dārāgnihotrasamyoge na doṣaḥ parivedane (II,1, p. 52) // Par_4.28 //

jyeṣṭho bhrātā yadā tiṣṭhed ādhānaṃ naiva kārayet /

anujñātas tu kurvīta śaṅkhasya vacanaṃ yathā // Par_4.29 //

naṣṭe mṛte pravrajite klībe ca patite patau /

pañcasv āpatsu nārīṇāṃ patir anyo vidhīyate (II,1, p. 53) // Par_4.30 //

mṛte bhartari yā nārī brahmacaryavrate sthitā /

sā mṛtā labhate svargaṃ yathā te brahmacāriṇaḥ // Par_4.31 //

tisraḥ koṭyo 'rdhakoṭī ca yāni romāṇi mānuṣe /

tāvatkālaṃ vaset svarge bhartāraṃ yānugacchati (II,1, p. 54) // Par_4.32 //

vyālagrāhī yathā vyālaṃ balād uddharate bilāt /

evaṃ strī patim uddhṛtya tenaiva saha modate (II,1, p. 57) // Par_4.33 //