Chapter 3

ataḥ śuddhiṃ pravakṣyāmi janane maraṇe tathā /

dinatrayeṇa śudhyanti brāhmaṇāḥ pretasūtake (I,2, p. 204) // Par_3.1 //

kṣatriyo dvādaśāhena vaiśyaḥ pañcadaśāhakaiḥ /

śūdraḥ śudhyati māsena parāśaravaco yathā // Par_3.2 //

upāsane tu viprāṇām aṅgaśuddhiś ca jāyate /

brāhmaṇānāṃ prasūtau tu dehasparśo vidhīyate (I,2, p. 212) // Par_3.3 //

jātau vipro daśāhena dvādaśāhena bhūmipaḥ /

vaiśyaḥ pañcadaśāhena śūdro māsena śudhyati (I,2, p. 213) // Par_3.4 //

ekāhāc chudhyate vipro yo 'gnivedasamanvitaḥ /

tryahāt kevalavedas tu dvihīno daśabhir dinaiḥ (I,2, p. 215) // Par_3.5 //

janmakarmaparibhraṣṭaḥ saṃdhyopāsanavarjitaḥ /

nāmadhārakavipras tu daśāhaṃ sūtakī bhavet (I,2, p. 217) // Par_3.6 //

ekapiṇḍās tu dāyādāḥ pṛthagdāraniketanāḥ /

janmany api vipattau ca teṣāṃ tat sūtakaṃ bhavet (I,2, p. 219) // Par_3.7 //

tāvat tat sūtakaṃ gotre caturthapuruṣeṇa tu /

dāyād vicchedam āpnoti pañcamo vātmavaṃśajaḥ (I,2, p. 221) // Par_3.8 //

caturthe daśarātraṃ syāt ṣaṇṇiśāḥ puṃsi pañcame /

ṣaṣṭhe caturahāc chuddhiḥ saptame tu dinatrayāt (I,2, p. 222) // Par_3.9 //

bhṛgvagnimaraṇe caiva deśāntaramṛte tathā /

bāle prete ca saṃnyaste sadyaḥ śaucaṃ vidhīyate (I,2, p. 223) // Par_3.10 //

deśāntaramṛtaḥ kaścit sagotraḥ śrūyate yadi /

na trirātram ahorātraṃ sadyaḥ snātvā śucir bhavet (I,2, p. 232) // Par_3.11 //

deśāntaragato vipraḥ prayāsāt kālakāritāt /

dehanāśam anuprāptas tithir na jñāyate yadi (I,2, p. 236) // Par_3.12 //

kṛṣṇāṣṭamī tv amāvāsyā kṛṣṇā caikādaśī ca yā /

udakaṃ piṇḍadānaṃ ca tatra śrāddhaṃ ca kārayet // Par_3.13 //

ajātadantā ye bālā ye ca garbhād viniḥsṛtāḥ /

na teṣām agnisaṃskāro nāśaucaṃ nodakakriyā (I,2, p. 237) // Par_3.14 //

yadi garbho vipadyeta sravate vāpi yoṣitaḥ /

yāvanmāsaṃ sthito garbho dinaṃ tāvat tu sūtakam (I,2, p. 238) // Par_3.15 //

ā caturthād bhavet srāvaḥ pātaḥ pañcamaṣaṣṭhayoḥ /

ata ūrdhvaṃ prasūtiḥ syād daśāhaṃ sūtakaṃ bhavet (I,2, p. 240) // Par_3.16 //

dantajāte 'nujāte ca kṛtacūḍe ca saṃsthite /

agnisaṃskaraṇe teṣāṃ trirātram aśucir bhavet (I,2, p. 241) // Par_3.16/1 //

ā dantajanmanaḥ sadya ā cūḍān naiṣikī smṛtā /

trirātram ā vratādeśād daśarātram ataḥ param (I,2, p. 243) // Par_3.17 //

brahmacārī gṛhe yeṣāṃ hūyate ca hutāśanaḥ /

saṃparkaṃ na ca kurvanti na teṣāṃ sūtakaṃ bhavet (I,2, p. 253) // Par_3.18 //

saṃparkād duṣyate vipro janane maraṇe tathā /

saṃparkāc ca nivṛttasya na pretaṃ naiva sūtakam (I,2, p. 254) // Par_3.19 //

śilpinaḥ kārukā vaidyā dāsīdāsāś ca nāpitāḥ /

rājānaḥ śrotriyāś caiva sadyaḥ śaucāḥ prakīrtitāḥ // Par_3.20 //

savrataḥ satrapūtaś ca āhitāgniś ca yo dvijaḥ /

rājñaś ca sūtakaṃ nāsti yasya cecchati pārthivaḥ (I,2, p. 255) // Par_3.21 //

udyato nidhane dāne ārto vipro nimantritaḥ /

tadaiva ṛṣibhir dṛṣṭaṃ yathā kālena śudhyati // Par_3.22 //

prasave gṛhamedhī tu na kuryāt saṃkaraṃ yadi /

daśāhāc chudhyate mātā tv avagāhya pitā śuciḥ (I,2, p. 259) // Par_3.23 //

sarveṣāṃ śāvam āśaucaṃ mātā pitros tu sūtakam /

sūtakaṃ mātur eva syād upaspṛśya pitā śuciḥ // Par_3.24 //

yadi patnyāṃ prasūtāyāṃ saṃparkaṃ kurute dvijaḥ /

sūtakaṃ tu bhavet tasya yadi vipraḥ ṣaḍaṅgavit (I,2, p. 260) // Par_3.25 //

saṃparkāj jāyate doṣo nānyo doṣo 'sti vai dvije /

tasmāt sarvaprayatnena saṃparkaṃ varjayed budhaḥ (I,2, p. 261) // Par_3.26 //

vivāhotsavayajñeṣu tv antarā mṛtasūtake /

pūrvasaṃkalpitaṃ dravyaṃ dīyamānaṃ na duṣyati (I,2, p. 262) // Par_3.27 //

antarā daśāhasya punar maraṇajanmanī /

tāvat syād aśucir vipro yāvat tat syād anirdaśam (I,2, p. 263) // Par_3.28 //

brāhmaṇārthe vipannānāṃ bandigograhaṇe tathā /

āhaveṣu vipannānām ekarātram aśaucakam (I,2, p. 268) // Par_3.29 //

dvāv imau puruṣau loke sūryamaṇḍalabhedinau /

parivrāḍ yogayuktaś ca raṇe cābhimukho hataḥ // Par_3.30 //

yatra yatra hataḥ śūraḥ śatrubhiḥ pariveṣṭitaḥ /

akṣayāṃl labhate lokān yadi klībaṃ na bhāṣate (I,2, p. 269) // Par_3.31 //

saṃnyastaṃ brāhmaṇaṃ dṛṣṭvā sthānāc calati bhāskaraḥ /

eṣa me maṇḍalaṃ bhittvā paraṃ sthānaṃ prayāsyati (I,2, p. 270) // Par_3.32 //

yas tu bhagneṣu sainyeṣu vidravatsu samantataḥ /

paritrātā yadā gacchet sa ca kratuphalaṃ labhet (I,2, p. 271) // Par_3.33 //

yasya cchedakṣataṃ gātraṃ śaramudgarayaṣṭibhiḥ /

devakanyās tu taṃ vīraṃ haranti ramayanti ca // Par_3.34 //

devāṅganāsahasrāṇi śūram āyodhane hatam /

tvaramāṇāḥ pradhāvanti mama bhartā mameti ca (I,2, p. 272) // Par_3.35 //

yaṃ yajñasaṃghais tapasā ca viprāḥ svargaiṣiṇo vātra yathā yānti /

kṣaṇena yānty eva hi tatra vīrāḥ prāṇān suyuddhena parityajantaḥ // Par_3.36 //

jitena labhyate lakṣmīr mṛtenāpi surāṅganāḥ /

kṣaṇadhvaṃsini kāye 'smin kā cintā maraṇe raṇe (I,2, p. 273) // Par_3.37 //

lalāṭadeśe rudhiraṃ sravac ca yasyāhave tu praviśec ca vaktram /

tat somapānena kilāsya tulyaṃ saṃgrāmayajñe vidhivac ca dṛṣṭam // Par_3.38 //

anāthaṃ brāhmaṇaṃ pretaṃ ye vahanti dvijātayaḥ /

pade pade yajñaphalam ānupūrvyāṃl labhanti te (I,2, p. 274) // Par_3.39 //

na teṣām aśubhaṃ kiṃcit pāpaṃ vā śubhakarmaṇām /

jalāvagāhanāt teṣāṃ sadyaḥśaucaṃ vidhīyate // Par_3.40 //

asagotram abandhuṃ ca pretībhūtaṃ dvijottamam /

vahitvā ca dahitvā ca prāṇāyāmena śudhyati (I,2, p. 275) // Par_3.41 //

anugamyecchayā pretaṃ jñātim ajñātim eva vā /

snātvā sacailaṃ spṛṣṭvāgniṃ ghṛtaṃ prāśya viśudhyati (I,2, p. 280) // Par_3.42 //

kṣatriyaṃ mṛtam ajñānād brāhmaṇo yo 'nugacchati /

ekāham aśucir bhūtvā pañcagavyena śudhyati (I,2, p. 281) // Par_3.43 //

śavaṃ ca vaiśyam ajñānād brāhmaṇo yo 'nugacchati /

kṛtvāśaucaṃ dvirātraṃ ca prāṇāyāmān ṣaḍ ācaret (I,2, p. 282) // Par_3.44 //

pretībhūtaṃ tu yaḥ śūdraṃ brāhmaṇo jñānadurbalaḥ /

anugacchen nīyamānaṃ trirātram aśucir bhavet // Par_3.45 //

trirātre tu tataḥ pūrṇe nadīṃ gatvā samudragām /

prāṇāyāmaśataṃ kṛtvā ghṛtaṃ prāśya viśudhyati // Par_3.46 //

vinirvartya yadā śūdrā udakāntam upasthitāḥ /

dvijais tadānugantavyā eṣa dharmaḥ sanātanaḥ (I,2, p. 283) // Par_3.47 //