kahan talak kahoon saqi ke laa sharaab to de
19th Century Sheikh Ibrahim Zauq Urdutransliterator: thothica
work_id: "0fa79898-d38f-4725-91d2-05e4c28435c9" work_slug: "sheikh-ibrahim-zauq-diwan-e-zauq-0fa798" work_title: "Diwan-E-Zauq" author_name: Sheikh Ibrahim Zauq chapter_number: 58 chapter_title: kahan talak kahoon saqi ke laa sharaab to de chapter_slug: "58-kahan-talak-kahoon-saqi-ke-laa-sharaab-to-de" variant_id: "85e17fd6-5892-4492-92eb-804a747a0d87" content_type: transliteration layout: verse language: Urdu source_language: Urdu language_direction: ltr script: latin word_count: 308 estimated_read_time: 2
kahan talak kahoon saqi ke laa sharaab to de na de sharaab dubo kar koi kabaab to de
bujhega soz-e-dil ae girya pal mein aab to de digar hai aag mein duniya yoon hi azaab to de
guzarne gar yeh mere sar se itna aab to de ke sar pe charkh bhi dikhlaayi joon hubaab to de
hazaron tishna jigar kis se hoenge sairaab khuda ke waaste tegh-e-sitam ko aab to de
tumhare matla-e-abru pe yeh kahe hai khaal ke aisa nuqta koi waqt-e-intekhab to de
dar-e-qubool hai darbaan na band kar dar-e-yaar dua-e-khair meri hone mustajaab to de
khule hai naaz se gulshan mein ghuncha-e-nargis zara dikha to use chashm-e-neem-khwaab to de
bala se aap na aayein pe aadmi un ka tasalli aa ke mujhe waqt-e-iztiraab to de
hawa bagole mein hai kushtagaan-e-zulf ki khaak ke baad-e-marg bhi maloom pech-o-taab to de
bala se kam na ho girya se mera soz-e-jigar bujha par un ki zara aatish-e-ataab to de
shaheed keejiyo qaatil abhi na kar jaldi theherne mujh ko teh-e-tegh-e-iztiraab to de
shikaar-e-basta-e-fitraak ko tere maqdoor hua na yeh bhi ke bosa sar-e-rikaab to de
dil-e-birishta ko mere na chhoro mai-khwaaro jo lazzat is mein hai aisa maza kabaab to de
nashe mein hosh kise jo gine hisaab kare jo tujh ko dena hain bose bila hisaab to de
jawaab-e-nama nahin gar to rakh do nama-e-yaar jo poochhein qabr mein aashiq se kuch jawaab to de
rakhe hai hausla darya kab ahl-e-himmat ka nahin yeh itna ke bhar kasa-e-hubaab to de
kahan bujhi hai teh-e-khaak meri aatish-e-dil kaho hawa se hila daaman-e-sahaab to de
khunak dilon ki agar aah-e-sard dozakh mein pade to waqai ik baar aag daab to de
karega qatl woh ae 'Zauq' tujh ko surme se nigah ki tegh ko hone siyaah-taab to de
pahunch rahunga sar-e-manzil-e-fana ae 'Zauq' misaal-e-naqsh-e-qadam karne pa-turaab to de