iss sang-e-aastaan peh jabeen-e-niyaaz hai

transliterator: thothica

work_id: "0fa79898-d38f-4725-91d2-05e4c28435c9" work_slug: "sheikh-ibrahim-zauq-diwan-e-zauq-0fa798" work_title: "Diwan-E-Zauq" author_name: Sheikh Ibrahim Zauq chapter_number: 57 chapter_title: "iss sang-e-aastaan peh jabeen-e-niyaaz hai" chapter_slug: "57-iss-sang-e-aastaan-peh-jabeen-e-niyaaz-hai" variant_id: "8365ccca-f12d-493a-a40c-61f7e769f56f" content_type: transliteration layout: verse language: Urdu source_language: Urdu language_direction: ltr script: latin word_count: 150 estimated_read_time: 1

iss sang-e-aastaan peh jabeen-e-niyaaz hai woh apni jaanamaz hai aur yeh namaz hai

naasaaz hai jo hum se usi se yeh saaz hai kya khoob dil hai waah hamein jis peh naaz hai

pahuncha hai shab kamand laga kar wahan raqeeb sach hai haraam-zaade ki rassi daraaz hai

iss but peh gar Khuda bhi ho aashiq toh aaye rashk harchand jaanta hoon keh woh paakbaaz hai

maddah-e-khaal-e-roo-e-butaan hoon mujhe Khuda bakhshe toh kya ajab keh woh nukta-nawaaz hai

darta hoon khanjar uss ka na beh jaaye ho ke aab mere gale mein naala-e-aahan-gudaaz hai

darwaza mai-kade ka na kar band muhtasib zaalim Khuda se darr keh dar-e-tauba baaz hai

khaana-kharaabiyaan dil-e-beemaar-e-gham ki dekh woh hi dawa kharaab hai jo khaana-saaz hai

shabnam ki jaaye-gul se tapakti hain shokhiyaan gulshan mein kis ki khaak-e-shaheedaan-e-naaz hai

aah o fughaan na kar jo khule 'Zauq' dil ka haal har naala ik kaleed-e-dar-e-ganj-e-raaz hai