Waqt-e-peeri shabaab ki baatein

transliterator: thothica

work_id: "0fa79898-d38f-4725-91d2-05e4c28435c9" work_slug: "sheikh-ibrahim-zauq-diwan-e-zauq-0fa798" work_title: "Diwan-E-Zauq" author_name: Sheikh Ibrahim Zauq chapter_number: 50 chapter_title: "Waqt-e-peeri shabaab ki baatein" chapter_slug: "50-waqt-e-peeri-shabaab-ki-baatein" variant_id: "22ef3563-7fcd-45b5-a494-58671f9b7de9" content_type: transliteration layout: verse language: Urdu source_language: Urdu language_direction: ltr script: latin word_count: 116 estimated_read_time: 1

Waqt-e-peeri shabaab ki baatein Aisi hain jaise khwaab ki baatein

Phir mujhe le chala udhar dekho Dil-e-khaana-kharaab ki baatein

Waaiza chhod zikr-e-ne'mat-e-khuld Keh sharaab-o-kabaab ki baatein

Meh-jabeen yaad hain ke bhool gaye Woh shab-e-maahtaab ki baatein

Harf aaya jo aabru pe meri Hain yeh chashm-e-pur-aab ki baatein

Sunte hain us ko chhed chhed ke hum Kis maze se itaab ki baatein

Jaam-e-mai munh se tu laga apne Chhod sharm-o-hijaab ki baatein

Mujh ko ruswa karengi khoob ae dil Yeh teri iztiraab ki baatein

Jaao hota hai aur bhi khafqaan Sun ke naaseh janaab ki baatein

Qissa-e-zulf-e-yaar dil ke liye Hain ajab pech-o-taab ki baatein

Zikr kya josh-e-ishq mein ae Zauq Hum se hon sabr-o-taab ki baatein