Voh kaun hai jo mujh pe ta'assuf nahin karta

transliterator: thothica

work_id: "0fa79898-d38f-4725-91d2-05e4c28435c9" work_slug: "sheikh-ibrahim-zauq-diwan-e-zauq-0fa798" work_title: "Diwan-E-Zauq" author_name: Sheikh Ibrahim Zauq chapter_number: 49 chapter_title: "Voh kaun hai jo mujh pe ta'assuf nahin karta" chapter_slug: "49-voh-kaun-hai-jo-mujh-pe-taassuf-nahin-karta" variant_id: "374fe937-8230-4377-9d8c-aacdf318dcb0" content_type: transliteration layout: verse language: Urdu source_language: Urdu language_direction: ltr script: latin word_count: 114 estimated_read_time: 1

Voh kaun hai jo mujh pe ta'assuf nahin karta Par mera jigar dekh ke main uf nahin karta

Kya qahar hai waqfa hai abhi aane mein us ke Aur dam mera jaane mein tawaqquf nahin karta

Kuch aur gumaan dil mein na guzre tere kaafir Dam is liye main surah-e-yusuf nahin karta

Parhta nahin khat ghair mera waan kisi unwaan Jab tak ke woh mazmoon mein tasarruf nahin karta

Dil faqr ki daulat se mera itna ghani hai Duniya ke zar-o-maal pe main tuf nahin karta

Taa saaf kare dil na mai-e-saaf se sufi Kuch sood-o-safa ilm-e-tasawwuf nahin karta

Ae Zauq takalluf mein hai takleef saraasar Aaraam mein hai woh jo takalluf nahin karta