Nigah ka waar tha dil par phadakne jaan lagi

transliterator: thothica

work_id: "0fa79898-d38f-4725-91d2-05e4c28435c9" work_slug: "sheikh-ibrahim-zauq-diwan-e-zauq-0fa798" work_title: "Diwan-E-Zauq" author_name: Sheikh Ibrahim Zauq chapter_number: 43 chapter_title: Nigah ka waar tha dil par phadakne jaan lagi chapter_slug: "43-nigah-ka-waar-tha-dil-par-phadakne-jaan-lagi" variant_id: "bc7fced4-cb45-484d-95c3-f738ce8d83b3" content_type: transliteration layout: verse language: Urdu source_language: Urdu language_direction: ltr script: latin word_count: 158 estimated_read_time: 1

Nigah ka waar tha dil par phadakne jaan lagi Chali thi barchhi kisi par kisi ke aan lagi

Tera zubaan se milaana zubaan jo yaad aaya Na haaye haaye mein taalu se phir zubaan lagi

Kisi ke dil ka suno haal dil laga kar tum Jo howe dil ko tumhaare bhi meherbaan lagi

Tu woh hai maah-jabeen misl-e-deeda-e-anjum Rahe hai teri taraf chashm-e-yak-jahaan lagi

Khuda kare kahe tujh se yeh kuch Khuda-lagti Ke zulf ae but-e-badkeshaan tere kaan lagi

Udaayi hirs ne aa kar jahaan mein sab ki khaak Nahi hai kis ko hawa zer-e-aasmaan lagi

Kisi ki kaawish-e-muzhgaan se aaj saari raat Nahi palak se palak meri ek aan lagi

Tabaah bahr-e-jahaan mein thi apni kashti-e-umr So toot-phoot ke baare kinaare aan lagi

Tumhaare haath se seene mein dil se ta-ba-jigar Sinaan o khanjar o paikaan ki hai dukaan lagi

Khadang-e-yaar mere dil se kis tarah nikle Ke is ke saath hai ae Zauq meri jaan lagi