Lete hi dil jo aashiq-e-dil-soz ka chale

transliterator: thothica

work_id: "0fa79898-d38f-4725-91d2-05e4c28435c9" work_slug: "sheikh-ibrahim-zauq-diwan-e-zauq-0fa798" work_title: "Diwan-E-Zauq" author_name: Sheikh Ibrahim Zauq chapter_number: 33 chapter_title: "Lete hi dil jo aashiq-e-dil-soz ka chale" chapter_slug: "33-lete-hi-dil-jo-aashiq-e-dil-soz-ka-chale" variant_id: "121624de-adad-4e8e-b1af-df7856af2c74" content_type: transliteration layout: verse language: Urdu source_language: Urdu language_direction: ltr script: latin word_count: 335 estimated_read_time: 2

Lete hi dil jo aashiq-e-dil-soz ka chale Tum aag lene aaye the kya aaye kya chale

Tum chashm-e-surmagin ko jo apni dikha chale Baithe bithaye khaak mein hum ko mila chale

Deewana aa ke aur bhi dil ko bana chale Ek dam toh thehro aur bhi kya aaye kya chale

Hum lutf-e-sair-e-bagh-e-jahan khaak uda chale Shauq-e-visaal dil mein liye yaar ka chale

Ghairon ke saath chhod ke tum naqsh-e-paa chale Kya khoob phool gor pe meri chadha chale

Dikhla ke mujh ko nargis-e-beemar kya chale Aawara misl-e-aahu-e-sahra bana chale

Ae gham mujhe tamaam shab-e-hijr mein na khaa Rehne de kuch ke subah ka bhi nashta chale

Bal-be ghuroor-e-husn zameen par na rakhe paaon Maanind-e-aaftaab woh be-naqsh-e-paa chale

Kya le chale gali se teri hum ko joon naseem Aaye the sar pe khaak udaane uda chale

Afsos hai ke saaya-e-murgh-e-hawa ki tarah Hum jis ke saath saath chalein woh juda chale

Kya dekhta hai haath mera chhod de tabeeb Yaan jaan hi badan mein nahin nabz kya chale

Qaatil jo tere dil mein rukawat na ho toh kyun Ruk ruk ke mere halq pe khanjar tera chale

Le jaayein tere kushte ko jannat mein bhi agar Phir phir ke tere ghar ki taraf dekhta chale

Aalooda chashm mein na hui surme se nigaah Dekha jahan se saaf hi ahl-e-safa chale

Roz-e-azal se zulf-e-muambar ka hai aseer Kya ud ke tujh se taair-e-nikhat bhala chale

Saath apne le ke tosan-e-umr-e-rawaan ko aah Hum is saraaye-e-dehr mein kya aaye kya chale

Suljhaayein zulfein kya lab-e-dariya pe aap ne Har mauj misl-e-maar-e-siyah tum bana chale

Duniya mein jab se aaye raha ishq-e-gul-rukhaan Hum is jahan mein misl-e-saba khaak uda chale

Qaatil se dakhl kya hai ke jaan-bar ho apna hosh Gar ud ke misl-e-taair-e-rang-e-hina chale

Fikr-e-qana'at un ko mayassar hui kahan Duniya se dil mein le ke jo hirs-o-hawa chale

Is roo-e-aatishin ke tasavvur mein yaad-e-zulf Yaani ghazab hai aag lage aur hawa chale

Ae Zauq hai ghazab nigaah-e-yaar al-hafeez Woh kya bache ke jis pe yeh teer-e-qaza chale