Juda hoon yaar se hum aur na ho raqeeb juda

transliterator: thothica

work_id: "0fa79898-d38f-4725-91d2-05e4c28435c9" work_slug: "sheikh-ibrahim-zauq-diwan-e-zauq-0fa798" work_title: "Diwan-E-Zauq" author_name: Sheikh Ibrahim Zauq chapter_number: 24 chapter_title: Juda hoon yaar se hum aur na ho raqeeb juda chapter_slug: "24-juda-hoon-yaar-se-hum-aur-na-ho-raqeeb-juda" variant_id: "6c3d6248-86b8-4c2b-9612-6f100fa41c40" content_type: transliteration layout: verse language: Urdu source_language: Urdu language_direction: ltr script: latin word_count: 141 estimated_read_time: 1

Juda hoon yaar se hum aur na ho raqeeb juda Hai apna apna muqaddar juda naseeb juda

Teri gali se nikalte hi apna dum nikla Rahe hai kyun ke gulistan se andaleeb juda

Dikha de jalwa jo masjid mein woh but-e-kaafir Toh cheekh uthe muazzin juda khateeb juda

Juda na dard-e-judai ho gar mere aaza Huroof-e-dard ki soorat hoon ae tabeeb juda

Hai aur ilm-o-adab maktab-e-mohabbat mein Ke hai wahan ka muallim juda adeeb juda

Hujoom-e-ashk ke hum-raah kyun na ho naala Ke fauj se nahin hota kabhi naqeeb juda

Firaaq-e-khuld se gandum hai seena-chaak ab tak Ilaahi ho na watan se koi ghareeb juda

Kiya habeeb ko mujh se juda falak ne magar Na kar saka mere dil se gham-e-habeeb juda

Karein judai ka kis kis ki ranj hum ae Zauq Ke hone waale hain hum sab se an-qareeb juda