Chupke chupke gham ka khana koi hum se seekh jaaye

transliterator: thothica

work_id: "0fa79898-d38f-4725-91d2-05e4c28435c9" work_slug: "sheikh-ibrahim-zauq-diwan-e-zauq-0fa798" work_title: "Diwan-E-Zauq" author_name: Sheikh Ibrahim Zauq chapter_number: 12 chapter_title: Chupke chupke gham ka khana koi hum se seekh jaaye chapter_slug: "12-chupke-chupke-gham-ka-khana-koi-hum-se-seekh-jaaye" variant_id: "58a13e47-1afe-4ee0-9a97-786db1c391ff" content_type: transliteration layout: verse language: Urdu source_language: Urdu language_direction: ltr script: latin word_count: 334 estimated_read_time: 2

Chupke chupke gham ka khana koi hum se seekh jaaye Jee hi jee mein tilmilana koi hum se seekh jaaye

Abr kya aansu bahana koi hum se seekh jaaye Barq kya hai tilmilana koi hum se seekh jaaye

Zikr-e-shama-e-husn laana koi hum se seekh jaaye Un ko darparda jalana koi hum se seekh jaaye

Jhoot-moot afiyun khaana koi hum se seekh jaaye Un ko kaf laa kar darana koi hum se seekh jaaye

Sun ke aamad un ki az-khud-rafta ho jaate hain hum Peshwa lene ko jaana koi hum se seekh jaaye

Hum ne awwal hi kaha tha tu karega hum ko qatl Tewaron ka taad jaana koi hum se seekh jaaye

Lutf uthana hai agar manzoor us ke naaz ka Pehle us ka naaz uthana koi hum se seekh jaaye

Jo sikhaya apni qismat ne wagarna us ko ghair Kya sikhayega sikhana koi hum se seekh jaaye

Dekh kar qaatil ko bhar laaye kharash-e-dil mein khoon Sach toh yeh hai muskurana koi hum se seekh jaaye

Teer-o-paikaan dil mein jitne the diye hum ne nikaal Apne haathon ghar lutana koi hum se seekh jaaye

Keh do qaasid se ke jaaye kuch bahaane se wahan Gar nahi aata bahana koi hum se seekh jaaye

Khat mein likhwa kar unhein bheja toh matla'a dard ka Dard-e-dil apna jatana koi hum se seekh jaaye

Jab kaha marta hoon woh bole mera sar kaat kar Jhoot ko sach kar dikhana koi hum se seekh jaaye

Waan hile abru yahan pheri gale par hum ne tegh Baat ka eema se paana koi hum se seekh jaaye

Tegh toh ochi padi thi gir pade hum aap se Dil ko qaatil ke badhana koi hum se seekh jaaye

Zakhm ko seete hain sab par sozan-e-almas se Chaak seene ke silana koi hum se seekh jaaye

Poochhe mulla se jise karna ho sajda-e-sahu ka Seekhe gar apna bhulana koi hum se seekh jaaye

Kya hua ae Zauq hain joon mardumak hum ru-siyaah Lekin aankhon mein samana koi hum se seekh jaaye