Barq mera aashiyan kab ka jala kar le gayi

transliterator: thothica

work_id: "0fa79898-d38f-4725-91d2-05e4c28435c9" work_slug: "sheikh-ibrahim-zauq-diwan-e-zauq-0fa798" work_title: "Diwan-E-Zauq" author_name: Sheikh Ibrahim Zauq chapter_number: 9 chapter_title: Barq mera aashiyan kab ka jala kar le gayi chapter_slug: "09-barq-mera-aashiyan-kab-ka-jala-kar-le-gayi" variant_id: "70b11e5a-1c9c-48ef-8e00-b0653b0c50f1" content_type: transliteration layout: verse language: Urdu source_language: Urdu language_direction: ltr script: latin word_count: 255 estimated_read_time: 2

Barq mera aashiyan kab ka jala kar le gayi Kuch jo khakistar bacha aandhi uda kar le gayi

Us ke qadmon tak na betaabi badha kar le gayi Haaye do palte diye aur phir hata kar le gayi

Na-tawaani hum ko haathon haath utha kar le gayi Chyunti se chyunti daana chhuda kar le gayi

Subah-rukh se kaun shaam-e-zulf mein jaata tha aah Ae dil-e-shamat-zada shamat laga kar le gayi

Khoon se Farhad ke rangeen hua daman-e-koh Kyun na mauj-e-sheer yeh dhabba chhuda kar le gayi

Tum ne to chhora hi tha ae hum-rahaan-e-qafila Lekin aawaaz-e-jaras hum ko jaga kar le gayi

Nok-e-mizhgaan jab hui seena-figaaron se do-chaar Paara-haaye-dil se guldasta bana kar le gayi

Dekhi kuch dil ki kashish Laila ke naaqe ko tere Soo-e-Majnun aakhirash rasta bhula kar le gayi

Waah ae soz-e-daroon kooche mein us ke barq-e-aah Raat hum ko har qadam mash'al dikha kar le gayi

Woh gaye ghar ghair ke aur yaan hamein dam bhar ke baad Badgumaani un ke ghar sau ghar phira kar le gayi

Jo shaheed-e-naaz kooche mein tumhare tha pada Kya kahoon taqdeer use kyun kar utha kar le gayi

Dasht-e-wehshat mein bagola tha ke deewana tera Rooh-e-Majnun behr-e-istaqbaal aa kar le gayi

Aag mein hai kaun gir padta magar parwaane ko Aatish-e-soz-e-mohabbat thi jala kar le gayi

Ae pari pehlu se mere kya kahoon teri nigaah Dil uda kar le gayi ya par laga kar le gayi

Zauq mar jaane ka to apne koi mauqa na tha Koo-e-jaanan mein ajal na-haq laga kar le gayi