Azeezo is ko na ghadiyal ki sada samjho

transliterator: thothica

work_id: "0fa79898-d38f-4725-91d2-05e4c28435c9" work_slug: "sheikh-ibrahim-zauq-diwan-e-zauq-0fa798" work_title: "Diwan-E-Zauq" author_name: Sheikh Ibrahim Zauq chapter_number: 6 chapter_title: Azeezo is ko na ghadiyal ki sada samjho chapter_slug: "06-azeezo-is-ko-na-ghadiyal-ki-sada-samjho" variant_id: "05c58e44-75df-43f9-9818-34fb2d36728d" content_type: transliteration layout: verse language: Urdu source_language: Urdu language_direction: ltr script: latin word_count: 201 estimated_read_time: 1

Azeezo is ko na ghadiyal ki sada samjho Yeh umr-e-rafta ki apni sada-e-paa samjho

Baja kahe jise aalam use baja samjho Zaban-e-khalq ko naqqara-e-Khuda samjho

Na samjho dasht shifakhana-e-junoon hai yeh Jo khaak si bhi pade phaankni dawa samjho

Samajh to kor-sawadon ko ho jo ilm na ho Agar samajh bhi na ho kor-be-asa samjho

Pade kitab ke qisson mein kya karo dil saaf Safa ho dil to beh-az Rauzat-us-Safa samjho

Hanse jo woh mere rone pe to saf-e-mizhgaan Na samjho tum use deewar-e-qahqaha samjho

Nafas ki aamad-o-shud hai namaz-e-ahl-e-hayat Jo yeh qaza ho to ae ghaafilo qaza samjho

Tumhari raah mein milte hain khaak mein laakhon Is aarzoo mein ke tum apna khaak-e-paa samjho

Duaein dete hain hum dil se tegh-e-qaatil ko Lab-e-jarahat-e-dil ko lab-e-dua samjho

Baha diya mera khoon uss ne apne kooche mein Usi ko yaaro diyat samjho khoon-baha samjho

Samajh hai aur tumhari kahun main tum se kya Tum apne dil mein Khuda jaane sun ke kya samjho

Tumhein hai naam se kya kaam misl-e-aaina Jo roobaroo ho use surat-aashna samjho

Zehe-naseeb ke hangaam-e-mashq-e-teer-e-sitam Hamare dher ko tum to woh khaak ka samjho

Nahin hai kam zar-e-khaalis se zardi-e-rukhsaar Tum apne ishq ko ae Zauq keemiya samjho