Aate hi tu ne ghar ke phir jaane ki sunai

transliterator: thothica

work_id: "0fa79898-d38f-4725-91d2-05e4c28435c9" work_slug: "sheikh-ibrahim-zauq-diwan-e-zauq-0fa798" work_title: "Diwan-E-Zauq" author_name: Sheikh Ibrahim Zauq chapter_number: 3 chapter_title: Aate hi tu ne ghar ke phir jaane ki sunai chapter_slug: "03-aate-hi-tu-ne-ghar-ke-phir-jaane-ki-sunai" variant_id: "f0ae9344-36a3-4b71-ab01-72075cbd64ce" content_type: transliteration layout: verse language: Urdu source_language: Urdu language_direction: ltr script: latin word_count: 120 estimated_read_time: 1

Aate hi tu ne ghar ke phir jaane ki sunai Reh jaaun sun na kyonkar yeh toh buri sunai

Majnun o koh-kan ke sunte the yaar qisse Jab tak kahani hum ne apni na thi sunai

Shikwa kiya jo hum ne gaali ka aaj us se Shikwe ke saath us ne ik aur bhi sunai

Kuch keh raha hai naaseh kya jaane kya kahega Deta nahi mujhe toh ae be-khudi sunai

Kehne na paaye us se saari haqeeqat ik din Aadhi kabhi sunai aadhi kabhi sunai

Soorat dikhaye apni dekhein woh kis tarah se Awaaz bhi na hum ko jis ne kabhi sunai

Qeemat mein jins-e-dil ki maanga jo Zauq bosa Kya kya na us ne hum ko khoti-khari sunai