Ishq mujh ko nahin vehshat hi sahi

transliterator: thothica

work_id: "74ed4c1c-c3d2-47b4-b350-4539659ce0f9" work_slug: "mirza-ghalib-diwan-e-ghalib-74ed4c" work_title: "Diwan-E-Ghalib" author_name: Mirza Ghalib chapter_number: 84 chapter_title: Ishq mujh ko nahin vehshat hi sahi chapter_slug: "84-ishq-mujh-ko-nahin-vehshat-hi-sahi" variant_id: "b2776c05-3137-41ed-b10f-8b892bba868e" content_type: transliteration layout: verse language: Urdu source_language: Urdu language_direction: ltr script: latin word_count: 125 estimated_read_time: 1

Ishq mujh ko nahin vehshat hi sahi Meri vehshat teri shohrat hi sahi

Qata keeje na ta'alluq hum se Kuch nahin hai to adaavat hi sahi

Mere hone mein hai kya rusvaai Ae woh majlis nahin khalvat hi sahi

Hum bhi dushman toh nahin hain apne Ghair ko tujh se mohabbat hi sahi

Apni hasti hi se ho jo kuch ho Aagahi gar nahin ghaflat hi sahi

Umr har-chand ke hai barq-khiraam Dil ke khoon karne ki fursat hi sahi

Hum koi tark-e-wafa karte hain Na sahi ishq museebat hi sahi

Kuch toh de ae falak-e-na-insaaf Aah-o-faryaad ki rukhsat hi sahi

Hum bhi tasleem ki khoo daalein-ge Be-niyaazi teri aadat hi sahi

Yaar se chhed chali jaaye 'Asad' Gar nahin wasl toh hasrat hi sahi