Is bazm mein mujhe nahin banti haya kiye

transliterator: thothica

work_id: "74ed4c1c-c3d2-47b4-b350-4539659ce0f9" work_slug: "mirza-ghalib-diwan-e-ghalib-74ed4c" work_title: "Diwan-E-Ghalib" author_name: Mirza Ghalib chapter_number: 83 chapter_title: Is bazm mein mujhe nahin banti haya kiye chapter_slug: "83-is-bazm-mein-mujhe-nahin-banti-haya-kiye" variant_id: "a5f36db4-d5c4-4253-81b8-a49734b0be2c" content_type: transliteration layout: verse language: Urdu source_language: Urdu language_direction: ltr script: latin word_count: 137 estimated_read_time: 1

Is bazm mein mujhe nahin banti haya kiye Baitha raha agarche ishaare hua kiye

Dil hi toh hai siyasat-e-darbaan se dar gaya Main aur jaaun dar se tere bin sada kiye

Rakhta phirun hoon khirqa-o-sajjada rehn-e-mai Muddat hui hai daawat-e-aab-o-hava kiye

Be-sarfa hi guzarti hai ho garche umr-e-Khizr Hazrat bhi kal kahenge ke hum kya kiya kiye

Maqdoor ho toh khaak se poochun ke ae laeem Tu ne woh ganj-haaye-giraan-maaya kya kiye

Kis roz tuhmatein na taraasha kiye adoo Kis din hamare sar pe na aaray chala kiye

Sohbat mein ghair ki na padi ho kahin yeh khoo Dene laga hai bosa baghair iltija kiye

Zid ki hai aur baat magar khoo buri nahin Bhoole se usne saikdon waade wafa kiye

Ghalib tumhin kaho ke milega jawaab kya Maana ke tum kaha kiye aur woh suna kiye