Hazaaron khwahishein aisi ke har khwahish pe dam nikle

transliterator: thothica

work_id: "74ed4c1c-c3d2-47b4-b350-4539659ce0f9" work_slug: "mirza-ghalib-diwan-e-ghalib-74ed4c" work_title: "Diwan-E-Ghalib" author_name: Mirza Ghalib chapter_number: 70 chapter_title: Hazaaron khwahishein aisi ke har khwahish pe dam nikle chapter_slug: "70-hazaaron-khwahishein-aisi-ke-har-khwahish-pe-dam-n" variant_id: "3db1e083-8b2e-489a-b61d-5321f9961bd5" content_type: transliteration layout: verse language: Urdu source_language: Urdu language_direction: ltr script: latin word_count: 164 estimated_read_time: 1

Hazaaron khwahishein aisi ke har khwahish pe dam nikle Bohat nikle mere armaan lekin phir bhi kam nikle

Dare kyun mera qaatil kya rahega us ki gardan par Woh khoon jo chashm-e-tar se umr bhar yun dam-ba-dam nikle

Nikalna khuld se Adam ka sunte aaye hain lekin Bohat be-aabru ho kar tere kooche se hum nikle

Bharam khul jaaye zaalim tere qaamat ki daraazi ka Agar is turra-e-pur-pech-o-kham ka pech-o-kham nikle

Magar likhwaye koi us ko khat toh hum se likhwaye Hui subah aur ghar se kaan par rakh kar qalam nikle

Hui is daur mein mansoob mujh se baada-aashaami Phir aaya woh zamana jo jahaan mein jaam-e-jam nikle

Hui jin se tawaqqo khastagi ki daad paane ki Woh hum se bhi zyaada khasta-e-tegh-e-sitam nikle

Mohabbat mein nahin hai farq jeene aur marne ka Usi ko dekh kar jeete hain jis kaafir pe dam nikle

Kahaan maikhane ka darwaza Ghalib aur kahaan waaiz Par itna jaante hain kal woh jaata tha ke hum nikle