Har ek baat pe kehte ho tum ke tu kya hai

transliterator: thothica

work_id: "74ed4c1c-c3d2-47b4-b350-4539659ce0f9" work_slug: "mirza-ghalib-diwan-e-ghalib-74ed4c" work_title: "Diwan-E-Ghalib" author_name: Mirza Ghalib chapter_number: 66 chapter_title: Har ek baat pe kehte ho tum ke tu kya hai chapter_slug: "66-har-ek-baat-pe-kehte-ho-tum-ke-tu-kya-hai" variant_id: "28f1c40d-53b2-421f-bd26-5a1fc2766b3e" content_type: transliteration layout: verse language: Urdu source_language: Urdu language_direction: ltr script: latin word_count: 158 estimated_read_time: 1

Har ek baat pe kehte ho tum ke tu kya hai Tumhein kaho ke yeh andaaz-e-guftugu kya hai Na shole mein yeh karishma na barq mein yeh ada Koi batao ke woh shokh-e-tund-khu kya hai Yeh rashk hai ke woh hota hai hum-sukhan tum se Wagarna khauf-e-bad-amozi-e-adoo kya hai Chipak raha hai badan par lahu se pairahan Hamare jaib ko ab haajat-e-rafu kya hai Jala hai jism jahan dil bhi jal gaya hoga Kuredte ho jo ab raakh justuju kya hai Ragon mein daudte phirne ke hum nahin qaail Jab aankh hi se na tapka toh phir lahu kya hai Woh cheez jis ke liye hum ko ho behisht azeez Siwaaye baada-e-gulfaam-e-mushk-boo kya hai Piyun sharab agar khum bhi dekh loon do-chaar Yeh sheesha-o-qadah-o-kooza-o-suboo kya hai Rahi na taaqat-e-guftaar aur agar ho bhi Toh kis ummeed pe kahiye ke aarzoo kya hai Hua hai sheh ka musahib phire hai itraata Wagarna sheher mein Ghalib ki aabru kya hai