Hai baske har ek unke ishaare mein nishaan aur

transliterator: thothica

work_id: "74ed4c1c-c3d2-47b4-b350-4539659ce0f9" work_slug: "mirza-ghalib-diwan-e-ghalib-74ed4c" work_title: "Diwan-E-Ghalib" author_name: Mirza Ghalib chapter_number: 60 chapter_title: Hai baske har ek unke ishaare mein nishaan aur chapter_slug: "60-hai-baske-har-ek-unke-ishaare-mein-nishaan-aur" variant_id: "e80004d3-6434-4710-bfd1-f4f8104cbf60" content_type: transliteration layout: verse language: Urdu source_language: Urdu language_direction: ltr script: latin word_count: 185 estimated_read_time: 1

Hai baske har ek unke ishaare mein nishaan aur Karte hain mohabbat toh guzarta hai gumaan aur

Ya Rab woh na samjhe hain na samjhenge meri baat De aur dil unko jo na de mujhko zabaan aur

Abru se hai kya us nigaah-e-naaz ko paiwand Hai teer muqarrar magar uski hai kamaan aur

Tum sheher mein ho toh hamein kya gham jab uthenge Le aayenge bazaar se jaa kar dil o jaan aur

Har chand subuk-dast hue but-shikani mein Hum hain toh abhi raah mein hai sang-e-giraan aur

Hai khoon-e-jigar josh mein dil khol ke rota Hote jo kai deeda-e-khoon-naaba-fishaan aur

Marta hoon is aawaaz pe har chand sar ud jaaye Jallaad ko lekin woh kahe jaayein ke haan aur

Logon ko hai khursheed-e-jahaan-taab ka dhoka Har roz dikhaata hoon main ek daagh-e-nihaan aur

Leta na agar dil tumhein deta koi dam chain Karta jo na marta koi din aah-o-fughaan aur

Paate nahin jab raah toh chadh jaate hain naale Rukti hai meri tabaa toh hoti hai rawaan aur

Hain aur bhi duniya mein sukhan-war bohat achhe Kehte hain ke 'Ghalib' ka hai andaaz-e-bayaan aur