Hai aarmidagi mein nekohish baja mujhe

transliterator: thothica

work_id: "74ed4c1c-c3d2-47b4-b350-4539659ce0f9" work_slug: "mirza-ghalib-diwan-e-ghalib-74ed4c" work_title: "Diwan-E-Ghalib" author_name: Mirza Ghalib chapter_number: 59 chapter_title: Hai aarmidagi mein nekohish baja mujhe chapter_slug: "59-hai-aarmidagi-mein-nekohish-baja-mujhe" variant_id: "c46940f1-f80c-42c5-b536-24c465cddd00" content_type: transliteration layout: verse language: Urdu source_language: Urdu language_direction: ltr script: latin word_count: 138 estimated_read_time: 1

Hai aarmidagi mein nekohish baja mujhe Subh-e-watan hai khanda-e-dandaan-numa mujhe

Dhoonde hai us mughanni-e-aatish-nafas ko jee Jis ki sada ho jalwa-e-barq-e-fana mujhe

Mastaana tay karoon hoon rah-e-waadi-e-khayal Ta baaz-gasht se na rahe mudda'a mujhe

Karta hai bas-ke baagh mein tu be-hijaabiyan Aane lagi hai nikhat-e-gul se haya mujhe

Khulta kisi pe kyun mere dil ka maamla Sheron ke intekhaab ne ruswa kiya mujhe

Waan rang-ha ba-parda-e-tadbeer hain hanoz Yaan shola-e-charaagh hai barg-e-hina mujhe

Parwaaz-ha niyaaz-e-tamasha-e-husn-e-dost Baal-kushada hai nigah-e-aashna mujhe

Az-khud-guzashtagi mein khamoshi pe harf hai Mauj-e-ghubaar-e-surma hui hai sada mujhe

Ta chand past-fitrati-e-taba-e-aarzoo Ya Rab mile bulandi-e-dast-e-dua mujhe

Main ne junoon se ki jo 'Asad' iltemas-e-rang Khoon-e-jigar mein ek hi ghota diya mujhe

Hai pech-o-taab rishta-e-shama-e-sahar-gahi Khijlat gudaazi-e-nafas-e-na-rasa mujhe

Yaan aab-o-daana mausam-e-gul mein haraam hai Zunnaar-wa-gusasta hai mauj-e-saba mujhe

Yak-baar imtihaan-e-hawas bhi zaroor hai Ae josh-e-ishq baada-e-mard-aazma mujhe