Dost gham-khwaari mein meri sa'i farmaaveinge kya

transliterator: thothica

work_id: "74ed4c1c-c3d2-47b4-b350-4539659ce0f9" work_slug: "mirza-ghalib-diwan-e-ghalib-74ed4c" work_title: "Diwan-E-Ghalib" author_name: Mirza Ghalib chapter_number: 39 chapter_title: "Dost gham-khwaari mein meri sa'i farmaaveinge kya" chapter_slug: "39-dost-gham-khwaari-mein-meri-sai-farmaaveinge-kya" variant_id: "ea977818-e12f-476a-8a3b-b4e32ddde002" content_type: transliteration layout: verse language: Urdu source_language: Urdu language_direction: ltr script: latin word_count: 108 estimated_read_time: 1

Dost gham-khwaari mein meri sa'i farmaaveinge kya Zakhm ke bharte talak naakhun na badh jaaveinge kya

Be-niyaazi had se guzri banda-parwar kab talak Hum kaheinge haal-e-dil aur aap farmaaveinge kya

Hazrat-e-naaseh gar aavein deeda-o-dil farsh-e-raah Koi mujh ko yeh toh samjha do ke samjhaaveinge kya

Aaj waan tegh-o-kafan baandhe huey jaata hoon main Uzr mere qatl karne mein woh ab laaveinge kya

Gar kiya naaseh ne hum ko qaid achha yoon sahi Yeh junoon-e-ishq ke andaaz chhut jaaveinge kya

Khaana-zaad-e-zulf hain zanjeer se bhaageinge kyun Hain giraftaar-e-wafa zindaan se ghabraaveinge kya

Hai ab is ma'moore mein qeht-e-gham-e-ulfat Asad Hum ne yeh maana ke Dilli mein rahein khaaveinge kya