Dil hi to hai na sang-o-khisht, dard se bhar na aaye kyun-

transliterator: thothica

work_id: "74ed4c1c-c3d2-47b4-b350-4539659ce0f9" work_slug: "mirza-ghalib-diwan-e-ghalib-74ed4c" work_title: "Diwan-E-Ghalib" author_name: Mirza Ghalib chapter_number: 33 chapter_title: "Dil hi to hai na sang-o-khisht, dard se bhar na aaye kyun-" chapter_slug: "33-dil-hi-to-hai-na-sang-o-khisht-dard-se-bhar-na-aay" variant_id: "6dfebded-f8b4-4c76-a0f9-7faac0d3a5fe" content_type: transliteration layout: verse language: Urdu source_language: Urdu language_direction: ltr script: latin word_count: 143 estimated_read_time: 1

Dil hi to hai na sang-o-khisht, dard se bhar na aaye kyun? Royenge hum hazaar baar, koi hamein sataaye kyun?

Dair nahin, haram nahin, dar nahin, aastaan nahin, Baithe hain rehguzar pe hum, ghair hamein uthaaye kyun?

Jab woh jamaal-e-dilfaroz, soorat-e-mehr-e-neemroz, Aap hi ho nazaara-soz, parde mein munh chhupaaye kyun?

Dashna-e-ghamza jaan-sitaan, naavak-e-naaz be-panaah, Tera hi aks-e-rukh sahi, saamne tere aaye kyun?

Qaid-e-hayaat-o-band-e-gham, asl mein donon ek hain, Maut se pehle aadmi gham se najaat paaye kyun?

Husn aur uss pe husn-e-zan, reh gayi bul-hawas ki sharam, Apne pe aitmaad hai, ghair ko aazmaaye kyun?

Waan woh ghuroor-e-izz-o-naaz, yaan yeh hijaab-e-paas-e-waza, Raah mein hum milein kahaan, bazm mein woh bulaaye kyun?

Haan woh nahin khuda-parast, jaao woh bewafa sahi, Jisko ho deen-o-dil azeez, uss ki gali mein jaaye kyun?

Ghalib-e-khasta ke baghair kaun se kaam band hain? Roiye zaar-zaar kya, kijiye haaye-haaye kyun?