Dekhna qismat ke aap apne pe rashk aa jaaye hai

transliterator: thothica

work_id: "74ed4c1c-c3d2-47b4-b350-4539659ce0f9" work_slug: "mirza-ghalib-diwan-e-ghalib-74ed4c" work_title: "Diwan-E-Ghalib" author_name: Mirza Ghalib chapter_number: 31 chapter_title: Dekhna qismat ke aap apne pe rashk aa jaaye hai chapter_slug: "31-dekhna-qismat-ke-aap-apne-pe-rashk-aa-jaaye-hai" variant_id: "f53bdcc5-f3df-42d1-901b-389417a2c3cb" content_type: transliteration layout: verse language: Urdu source_language: Urdu language_direction: ltr script: latin word_count: 175 estimated_read_time: 1

Dekhna qismat ke aap apne pe rashk aa jaaye hai Main usey dekhun bhala kab mujh se dekha jaaye hai

Haath dho dil se yahi garmi gar andeshe mein hai Aabgeena tundi-e-sahba se pighla jaaye hai

Ghair ko ya Rab woh kyun kar mana-e-gustakhi kare Gar haya bhi uss ko aati hai toh sharma jaaye hai

Shauq ko yeh latt ke har dam naala kheenche jaaiye Dil ki woh haalat ke dam lene se ghabra jaaye hai

Door chashm-e-bad teri bazm-e-tarab se waah waah Naghma ho jaata hai waan gar naala mera jaaye hai

Garchay hai tarz-e-taghaful parda-daar-e-raaz-e-ishq Par hum aise khoye jaate hain ke woh paa jaaye hai

Uss ki bazm-aaraaiyan sun kar dil-e-ranjoor yaan Misl-e-naqsh-e-mudda'a-e-ghair baitha jaaye hai

Ho ke aashiq woh pari-rukh aur naazuk ban gaya Rang khilta jaaye hai jitna ke udta jaaye hai

Naqsh ko uss ke musavvir par bhi kya kya naaz hain Kheenchta hai jis qadar utna hi khinchta jaaye hai

Saaya mera mujh se misl-e-dood bhaage hai Asad Paas mujh aatish-bajaan ke kis se thehra jaaye hai