Dard se mere hai tujh ko be-qarari haaye haaye

transliterator: thothica

work_id: "74ed4c1c-c3d2-47b4-b350-4539659ce0f9" work_slug: "mirza-ghalib-diwan-e-ghalib-74ed4c" work_title: "Diwan-E-Ghalib" author_name: Mirza Ghalib chapter_number: 27 chapter_title: "Dard se mere hai tujh ko be-qarari haaye haaye" chapter_slug: "27-dard-se-mere-hai-tujh-ko-be-qarari-haaye-haaye" variant_id: "c74884fd-1c49-46c1-bad4-0687270056cc" content_type: transliteration layout: verse language: Urdu source_language: Urdu language_direction: ltr script: latin word_count: 180 estimated_read_time: 1

Dard se mere hai tujh ko be-qarari haaye haaye Kya hui zaalim teri ghaflat-she'ari haaye haaye

Tere dil mein gar na tha aashob-e-gham ka hausla Tu ne phir kyun ki thi meri gham-gusaari haaye haaye

Kyun meri gham-khwargi ka tujh ko aaya tha khayal Dushmani apni thi meri dost-daari haaye haaye

Umr bhar ka tu ne paimaan-e-wafa baandha to kya Umr ko bhi to nahin hai paayedaari haaye haaye

Zeher lagti hai mujhe aab-o-hawa-e-zindagi Yaani tujh se thi ise na-saazgaari haaye haaye

Gul-fishaani-haaye-naaz-e-jalwa ko kya ho gaya Khaak par hoti hai teri laala-kaari haaye haaye

Sharm-e-ruswaai se ja chhupna naqaab-e-khaak mein Khatm hai ulfat ki tujh par parda-daari haaye haaye

Khaak mein naamoos-e-paimaan-e-mohabbat mil gayi Uth gayi duniya se raah-o-rasm-e-yaari haaye haaye

Haath hi tegh-aazma ka kaam se jaata raha Dil pe ik lagne na paaya zakhm-e-kaari haaye haaye

Kis tarah kaate koi shab-haaye-taar-e-barshgaal Hai nazar khoo-karda-e-akhtar-shumari haaye haaye

Gosh-e-mahjoor-e-payaam o chashm-e-mahroom-e-jamaal Ek dil, tis par yeh na-umeed-waari haaye haaye

Ishq ne pakda na tha Ghalib abhi wehshat ka rang Reh gaya tha dil mein jo kuchh zauq-e-khwaari haaye haaye