Dard minnat-kash-e-dawa na hua

درد منت_کش_دوا نہ ہوا میں نہ اچھا ہوا برا نہ ہوا

جمع کرتے ہو کیوں رقیبوں کو اک تماشا ہوا گلہ نہ ہوا

ہم کہاں قسمت آزمانے جائیں تو ہی جب خنجر_آزما نہ ہوا

کتنے شیریں ہیں تیرے لب کہ رقیب گالیاں کھا کے بے_مزا نہ ہوا

ہے خبر گرم ان کے آنے کی آج ہی گھر میں بوریا نہ ہوا

کیا وہ نمرود کی خدائی تھی بندگی میں مرا بھلا نہ ہوا

جان دی دی ہوئی اسی کی تھی حق تو یوں ہے کہ حق ادا نہ ہوا

زخم گر دب گیا لہو نہ تھما کام گر رک گیا روا نہ ہوا

رہزنی ہے کہ دل_ستانی ہے لے کے دل دل_ستاں روانہ ہوا

کچھ تو پڑھیے کہ لوگ کہتے ہیں آج غالبؔ غزل_سرا نہ ہوا