dhota hoon jab main peene ko us seem-tan ke paaon

transliterator: thothica

work_id: "74ed4c1c-c3d2-47b4-b350-4539659ce0f9" work_slug: "mirza-ghalib-diwan-e-ghalib-74ed4c" work_title: "Diwan-E-Ghalib" author_name: Mirza Ghalib chapter_number: 215 chapter_title: "dhota hoon jab main peene ko us seem-tan ke paaon" chapter_slug: "215-dhota-hoon-jab-main-peene-ko-us-seem-tan-ke-paaon" variant_id: "2abd1cf9-c6da-4798-971e-fc2b5b690cfa" content_type: transliteration layout: verse language: Urdu source_language: Urdu language_direction: ltr script: latin word_count: 131 estimated_read_time: 1

dhota hoon jab main peene ko us seem-tan ke paaon rakhta hai zid se kheench ke baahar lagan ke paaon

di saadgi se jaan padun koh-kan ke paaon haihaat kyun na toot gaye peer-zan ke paaon

bhaage the hum bahut so usi ki saza hai yeh ho kar aseer daabte hain raahzan ke paaon

marham ki justuju mein phira hoon jo door door tan se siwa figaar hain us khasta-tan ke paaon

Allah-re zauq-e-dasht-nawardi ke baad-e-marg hilte hain khud-ba-khud mere andar kafan ke paaon

hai josh-e-gul bahaar mein yaan tak ke har taraf udte hue ulajhte hain murgh-e-chaman ke paaon

shab ko kisi ke khwaab mein aaya na ho kahin dukhte hain aaj us but-e-naazuk-badan ke paaon

Ghalib mere kalaam mein kyun-kar maza na ho peeta hoon dhoke Khusrau-e-sheereen-sukhan ke paaon