bala se hain jo yeh pesh-e-nazar dar-o-deewar

transliterator: thothica

work_id: "74ed4c1c-c3d2-47b4-b350-4539659ce0f9" work_slug: "mirza-ghalib-diwan-e-ghalib-74ed4c" work_title: "Diwan-E-Ghalib" author_name: Mirza Ghalib chapter_number: 214 chapter_title: "bala se hain jo yeh pesh-e-nazar dar-o-deewar" chapter_slug: "214-bala-se-hain-jo-yeh-pesh-e-nazar-dar-o-deewar" variant_id: "3c7ab802-09cc-404d-9b35-dc9a0cab32ad" content_type: transliteration layout: verse language: Urdu source_language: Urdu language_direction: ltr script: latin word_count: 127 estimated_read_time: 1

bala se hain jo yeh pesh-e-nazar dar-o-deewar nigah-e-shauq ko hain baal-o-par dar-o-deewar

wufoor-e-ashk ne kaashaane ka kiya yeh rang ke ho gaye mere deewar-o-dar dar-o-deewar

nahin hai saaya ke sun kar naveed-e-maqdam-e-yaar gaye hain chand qadam peshtar dar-o-deewar

hui hai kis qadar arzaani-e-mai-e-jalwa ke mast hai tere kooche mein har dar-o-deewar

jo hai tujhe sar-e-sauda-e-intezaar toh aa ke hain dukaan-e-mata-e-nazar dar-o-deewar

hujoom-e-girya ka saamaan kab kiya main ne ke gir pade na mere paaon par dar-o-deewar

woh aa raha mere hamsaaye mein toh saaye se huye fida dar-o-deewar par dar-o-deewar

nazar mein khatke hai bin tere ghar ki aabadi hamesha rote hain hum dekh kar dar-o-deewar

na pooch be-khudi-e-aish-e-maqdam-e-sailaab ke naachte hain pade sar-ba-sar dar-o-deewar

na keh kisi se ke Ghalib nahin zamaane mein hareef-e-raaz-e-mohabbat magar dar-o-deewar