Tum jaano tum ko ghair se jo rasm-o-raah ho

transliterator: thothica

work_id: "74ed4c1c-c3d2-47b4-b350-4539659ce0f9" work_slug: "mirza-ghalib-diwan-e-ghalib-74ed4c" work_title: "Diwan-E-Ghalib" author_name: Mirza Ghalib chapter_number: 194 chapter_title: "Tum jaano tum ko ghair se jo rasm-o-raah ho" chapter_slug: "194-tum-jaano-tum-ko-ghair-se-jo-rasm-o-raah-ho" variant_id: "e380d57d-2634-4c18-8698-90d7d69a31b6" content_type: transliteration layout: verse language: Urdu source_language: Urdu language_direction: ltr script: latin word_count: 114 estimated_read_time: 1

Tum jaano tum ko ghair se jo rasm-o-raah ho Mujh ko bhi poochte raho toh kya gunaah ho

Bachte nahin muaakhiza-e-roz-e-hashr se Qaatil agar raqeeb hai toh tum gawaah ho

Kya woh bhi be-gunah-kash o haq-naashanaas hain Maana ke tum bashar nahin khursheed o maah ho

Ubhra hua naqaab mein hai unke ek taar Marta hoon main ke yeh na kisi ki nigaah ho

Jab mai-kada chhoota toh phir ab kya jagah ki qaid Masjid ho, madrasa ho, koi khanqah ho

Sunte hain jo bahisht ki taareef, sab durust Lekin Khuda kare woh tera jalwa-gaah ho

Ghalib bhi gar na ho toh kuch aisa zarar nahin Duniya ho Ya Rab aur mera baadshah ho