Qafas mein hoon gar achha bhi na jaanein mere shevan ko

transliterator: thothica

work_id: "74ed4c1c-c3d2-47b4-b350-4539659ce0f9" work_slug: "mirza-ghalib-diwan-e-ghalib-74ed4c" work_title: "Diwan-E-Ghalib" author_name: Mirza Ghalib chapter_number: 164 chapter_title: Qafas mein hoon gar achha bhi na jaanein mere shevan ko chapter_slug: "164-qafas-mein-hoon-gar-achha-bhi-na-jaanein-mere-shev" variant_id: "c5322ba5-b658-4a8b-b521-28ddac46f8b6" content_type: transliteration layout: verse language: Urdu source_language: Urdu language_direction: ltr script: latin word_count: 218 estimated_read_time: 1

Qafas mein hoon gar achha bhi na jaanein mere shevan ko Mera hona bura kya hai nawa-sanjaane-e-gulshan ko

Nahin gar hamdami aasaan na ho yeh rashk kya kam hai Na di hoti khudaya aarzoo-e-dost dushman ko

Na nikla aankh se teri ik aansu us jaraahat par Kiya seene mein jis ne khoon-chakaan mizhgaan-e-sozan ko

Khuda sharmaaye haathon ko ke rakhte hain kashakash mein Kabhi mere girebaan ko kabhi jaanaan ke daaman ko

Abhi hum qatl-gah ka dekhna aasaan samajhte hain Nahin dekha shanaawar joo-e-khoon mein tere tausan ko

Hua charcha jo mere paaon ki zanjeer ban'ne ka Kiya betaab kaan mein jumbish-e-johar ne aahan ko

Khushi kya khet par mere agar sau baar abr aave Samajhta hoon ke dhoonde hai abhi se barq khirman ko

Wafa-daari ba-shart-e-ustuwaari asl imaan hai Mere but-khaane mein to Kaabe mein gaado Brahman ko

Shahaadat thi meri qismat mein jo di thi yeh khoo mujh ko Jahaan talwaar ko dekha jhuka deta tha gardan ko

Na lutta din ko to kab raat ko yoon be-khabar sota Raha khatka na chori ka dua deta hoon rehzan ko

Sukhan kya keh nahin sakte ke joya hoon jawaahar ke Jigar kya hum nahin rakhte ke khodein ja ke maadan ko

Mere Shah-e-Suleimaan-jaah se nisbat nahin Ghalib Faridoon o Jam o Ke-Khusrau o Daaraab o Bahman ko