Nukta-cheen hai gham-e-dil uss ko sunaye na bane

transliterator: thothica

work_id: "74ed4c1c-c3d2-47b4-b350-4539659ce0f9" work_slug: "mirza-ghalib-diwan-e-ghalib-74ed4c" work_title: "Diwan-E-Ghalib" author_name: Mirza Ghalib chapter_number: 157 chapter_title: "Nukta-cheen hai gham-e-dil uss ko sunaye na bane" chapter_slug: "157-nukta-cheen-hai-gham-e-dil-uss-ko-sunaye-na-bane" variant_id: "f0fde9c2-a222-42c1-bf9f-5b2b82d734c2" content_type: transliteration layout: verse language: Urdu source_language: Urdu language_direction: ltr script: latin word_count: 169 estimated_read_time: 1

Nukta-cheen hai gham-e-dil uss ko sunaye na bane Kya bane baat jahan baat banaye na bane

Main bulata toh hoon uss ko magar ae jazba-e-dil Uss pe ban jaaye kuch aisi ke bin aaye na bane

Khel samjha hai kahin chhod na de bhool na jaaye Kaash yoon bhi ho ke bin mere sataye na bane

Ghair phirta hai liye yoon tere khat ko ke agar Koi poochhe ke yeh kya hai toh chhupaye na bane

Uss nazakat ka bura ho woh bhale hain toh kya Haath aawein toh unhein haath lagaye na bane

Keh sake kaun ke yeh jalwa-gari kis ki hai Parda chhora hai woh uss ne ke uthaye na bane

Maut ki raah na dekhoon ke bin aaye na rahe Tum ko chahoon ke na aao toh bulaye na bane

Bojh woh sar se gira hai ke uthaye na uthe Kaam woh aan pada hai ke banaye na bane

Ishq par zor nahin hai yeh woh aatish Ghalib Ke lagaye na lage aur bujhaye na bane