Nikohish hai saza faryadi-e-bedaad-e-dilbar ki

transliterator: thothica

work_id: "74ed4c1c-c3d2-47b4-b350-4539659ce0f9" work_slug: "mirza-ghalib-diwan-e-ghalib-74ed4c" work_title: "Diwan-E-Ghalib" author_name: Mirza Ghalib chapter_number: 156 chapter_title: "Nikohish hai saza faryadi-e-bedaad-e-dilbar ki" chapter_slug: "156-nikohish-hai-saza-faryadi-e-bedaad-e-dilbar-ki" variant_id: "0d63a5d7-7b16-4b4c-9652-4ed6ed6d36fe" content_type: transliteration layout: verse language: Urdu source_language: Urdu language_direction: ltr script: latin word_count: 119 estimated_read_time: 1

Nikohish hai saza faryadi-e-bedaad-e-dilbar ki Mubada khanda-e-dandaan-numa ho subah-e-mahshar ki

Rag-e-Laila ko khaak-e-dasht-e-Majnun reshgi bakhshe Agar bowe bajaaye-daana dehqaan nok-e-nishtar ki

Par-e-parwana shayad baadbaan-e-kashti-e-may tha Hui majlis ki garmi se rawani daur-e-saaghar ki

Karun bedaad-e-zauq-e-par-fishaani arz kya qudrat Ke taaqat ud gayi udne se pehle mere sheh-par ki

Kahan tak roun us ke khaime ke peechhe qayamat hai Miri qismat mein ya Rabb kya na thi deewar patthar ki

Bajuz deewangi hota na anjaam-e-khud-aaraai Agar paida na karta aaina zanjeer-e-jauhar ki

Ghurur-e-lutf-e-saqi nasha-e-bebaaki-e-mastaan Nam-e-daaman-e-isyaan hai tarawat mauj-e-kausar ki

Mera dil maangte hain aariyat ahl-e-hawas shayad Yeh jaana chahte hain aaj daawat mein samandar ki

Asad juz aab-bakhshidan ze-dariya Khizr ko kya tha Dubota chashma-e-haiwaan mein gar kashti Sikandar ki