Nala juz husn-e-talab ae sitam-ejaad nahin

transliterator: thothica

work_id: "74ed4c1c-c3d2-47b4-b350-4539659ce0f9" work_slug: "mirza-ghalib-diwan-e-ghalib-74ed4c" work_title: "Diwan-E-Ghalib" author_name: Mirza Ghalib chapter_number: 152 chapter_title: "Nala juz husn-e-talab ae sitam-ejaad nahin" chapter_slug: "152-nala-juz-husn-e-talab-ae-sitam-ejaad-nahin" variant_id: "d33f7828-6c7f-4fd6-8ae7-cff4919fb329" content_type: transliteration layout: verse language: Urdu source_language: Urdu language_direction: ltr script: latin word_count: 121 estimated_read_time: 1

Nala juz husn-e-talab ae sitam-ejaad nahin Hai taqaza-e-jafa shikwa-e-bedaad nahin

Ishq-o-mazdoori-e-ishrat-gah-e-Khusrau kya khoob Hum ko tasleem niko-naami-e-Farhad nahin

Kam nahin woh bhi kharabi mein peh vus'at maloom Dasht mein hai mujhe woh aish ke ghar yaad nahin

Ahl-e-beenish ko hai toofan-e-hawadis maktab Latma-e-mauj kam-az sili-e-ustaad nahin

Waaye mehroomi-e-tasleem-o-bada haal-e-wafa Jaanta hai ke hamein taaqat-e-faryaad nahin

Rang-e-tamkeen-e-gul-o-lala pareshaan kyun hai Gar charaghan-e-sar-e-rah-guzar-e-baad nahin

Sabad-e-gul ke talay band kare hai gul-cheen Muzhda ae murgh ke gulzaar mein sayyaad nahin

Nafi se karti hai isbaat taravish goya Di hai jaa-e-dahan uss ko dam-e-ejaad nahin

Kam nahin jalwa-gari mein tere kooche se bahisht Yehi naqsha hai walay iss qadar aabaad nahin

Karte kis munh se ho ghurbat ki shikayat Ghalib Tum ko be-mehri-e-yaaran-e-watan yaad nahin