Milti hai khuu-e-yaar se naar iltihaab mein

transliterator: thothica

work_id: "74ed4c1c-c3d2-47b4-b350-4539659ce0f9" work_slug: "mirza-ghalib-diwan-e-ghalib-74ed4c" work_title: "Diwan-E-Ghalib" author_name: Mirza Ghalib chapter_number: 138 chapter_title: "Milti hai khuu-e-yaar se naar iltihaab mein" chapter_slug: "138-milti-hai-khuu-e-yaar-se-naar-iltihaab-mein" variant_id: "ff98dfc4-c357-4211-9590-fe0725dd0aef" content_type: transliteration layout: verse language: Urdu source_language: Urdu language_direction: ltr script: latin word_count: 201 estimated_read_time: 1

Milti hai khuu-e-yaar se naar iltihaab mein Kaafir hoon gar na milti ho raahat azaab mein

Kab se hoon kya bataaun jahaan-e-kharaab mein Shab-haaye-hijr ko bhi rakhoon gar hisaab mein

Taa phir na intezaar mein neend aaye umr bhar Aane ka ahd kar gaye aaye jo khwaab mein

Qaasid ke aate aate khat ik aur likh rakhoon Main jaanta hoon jo woh likhenge jawaab mein

Mujh tak kab unki bazm mein aata tha daur-e-jaam Saaqi ne kuch mila na diya ho sharaab mein

Jo munkir-e-wafa ho fareb us pe kya chale Kyun bad-gumaan hoon dost se dushman ke baab mein

Main muztarib hoon vasl mein khauf-e-raqeeb se Daala hai tum ko waham ne kis pech-o-taab mein

Main aur hazz-e-vasl khuda-saaz baat hai Jaan nazr deni bhool gaya iztiraab mein

Hai tevari chadhi hui andar naqaab ke Hai ik shikan padi hui tarf-e-naqaab mein

Laakhon lagaao ek churaana nigaah ka Laakhon banaao ek bigadna ataab mein

Woh naala dil mein khas ke baraabar jagah na paaye Jis naale se shigaaf pade aaftaab mein

Woh sehar mudda'a-talabi mein na kaam aaye Jis sehar se safeena ravaan ho saraab mein

Ghalib chuti sharaab par ab bhi kabhi kabhi Peeta hoon roz-e-abr o shab-e-maahtaab mein