Muddat hui hai yaar ko mehmaan kiye hue

transliterator: thothica

work_id: "74ed4c1c-c3d2-47b4-b350-4539659ce0f9" work_slug: "mirza-ghalib-diwan-e-ghalib-74ed4c" work_title: "Diwan-E-Ghalib" author_name: Mirza Ghalib chapter_number: 139 chapter_title: Muddat hui hai yaar ko mehmaan kiye hue chapter_slug: "139-muddat-hui-hai-yaar-ko-mehmaan-kiye-hue" variant_id: "39dec189-57ce-4ddd-b7a0-71666e29e555" content_type: transliteration layout: verse language: Urdu source_language: Urdu language_direction: ltr script: latin word_count: 214 estimated_read_time: 1

Muddat hui hai yaar ko mehmaan kiye hue Josh-e-qadah se bazm charaghaan kiye hue

Karta hoon jama phir jigar-e-lakht-lakht ko Arsa hua hai daawat-e-mizhgaan kiye hue

Phir waz-e-ehtiyaat se rukne laga hai dam Barson hue hain chaak-e-garebaan kiye hue

Phir garm-naala-haaye-shararbaar hai nafas Muddat hui hai sair-e-charaghaan kiye hue

Phir pursish-e-jaraahat-e-dil ko chala hai ishq Saamaan-e-sad-hazaar namakdaan kiye hue

Phir bhar raha hoon khaama-e-mizhgaan ba-khoon-e-dil Saaz-e-chaman taraazi-e-daamaan kiye hue

Baaham-digar hue hain dil o deeda phir raqeeb Nazaara o khayaal ka saamaan kiye hue

Dil phir tawaaf-e-koo-e-malaamat ko jaaye hai Pindaar ka sanam-kada veeraan kiye hue

Phir shauq kar raha hai khareedaar ki talab Arz-e-mataa-e-aql-o-dil-o-jaan kiye hue

Daude hai phir har ek gul-o-laala par khayaal Sad-gulistaan nigaah ka saamaan kiye hue

Phir chaahta hoon naama-e-dil-daar kholna Jaan nazr-e-dil-farebi-e-unwaan kiye hue

Maange hai phir kisi ko lab-e-baam par hawas Zulf-e-siyaah rukh pe pareshaan kiye hue

Chaahe hai phir kisi ko muqaabil mein aarzoo Surme se tez dashna-e-mizhgaan kiye hue

Ik nau-bahaar-e-naaz ko taake hai phir nigaah Chehra farogh-e-mai se gulistaan kiye hue

Phir jee mein hai ke dar pe kisi ke pade rahein Sar zer-e-baar-e-minnat-e-darbaan kiye hue

Jee dhoondta hai phir wahi fursat ke raat din Baithe rahein tasavvur-e-jaanaan kiye hue

Ghalib humein na chhed ke phir josh-e-ashk se Baithe hain hum tahayya-e-toofaan kiye hue