Maze jahaan ke apni nazar mein khaak nahin

transliterator: thothica

work_id: "74ed4c1c-c3d2-47b4-b350-4539659ce0f9" work_slug: "mirza-ghalib-diwan-e-ghalib-74ed4c" work_title: "Diwan-E-Ghalib" author_name: Mirza Ghalib chapter_number: 134 chapter_title: Maze jahaan ke apni nazar mein khaak nahin chapter_slug: "134-maze-jahaan-ke-apni-nazar-mein-khaak-nahin" variant_id: "d36385ce-9604-4f26-84cc-136734eb3956" content_type: transliteration layout: verse language: Urdu source_language: Urdu language_direction: ltr script: latin word_count: 96 estimated_read_time: 1

Maze jahaan ke apni nazar mein khaak nahin Siwaaye khoon-e-jigar so jigar mein khaak nahin

Magar ghubaar hue par hawa udaa le jaaye Vagarna taab-o-tawaan baal-o-par mein khaak nahin

Yeh kis behisht-shamaail ki aamad aamad hai Ke ghair-e-jalwa-e-gul rehguzar mein khaak nahin

Bhala usey na sahi kuch mujhi ko rehm aata Asar mere nafs-e-be-asar mein khaak nahin

Khayaal-e-jalwa-e-gul se kharaab hain maikash Sharaab-khaane ke deewar-o-dar mein khaak nahin

Hua hoon ishq ki ghaarat-gari se sharminda Siwaaye hasrat-e-taameer ghar mein khaak nahin

Hamaare she'r hain ab sirf dil-lagi ke Asad Khula ke faaida arz-e-hunar mein khaak nahin