Baagh pa kar khafqani yeh darata hai mujhe

transliterator: thothica

work_id: "74ed4c1c-c3d2-47b4-b350-4539659ce0f9" work_slug: "mirza-ghalib-diwan-e-ghalib-74ed4c" work_title: "Diwan-E-Ghalib" author_name: Mirza Ghalib chapter_number: 13 chapter_title: Baagh pa kar khafqani yeh darata hai mujhe chapter_slug: "13-baagh-pa-kar-khafqani-yeh-darata-hai-mujhe" variant_id: "ebeda38d-9689-4257-8f55-fb1cba3c872f" content_type: transliteration layout: verse language: Urdu source_language: Urdu language_direction: ltr script: latin word_count: 124 estimated_read_time: 1

Baagh pa kar khafqani yeh darata hai mujhe Saya-e-shaakh-e-gul af'ii nazar aata hai mujhe

Jauhar-e-taigh ba-sar-e-chashma-e-deegar maloom Hoon main woh sabza ke zehr-aab ugata hai mujhe

Mudda'a mahv-e-tamasha-e-shikast-e-dil hai Aaina-khaane mein koi liye jaata hai mujhe

Nala sarmaya-e-yak-aalam o aalam kaf-e-khaak Aasmaan baiza-e-qumri nazar aata hai mujhe

Zindagi mein toh woh mehfil se utha dete the Dekhoon ab mar gaye par kaun uthata hai mujhe

Baagh tujh bin gul-e-nargis se darata hai mujhe Chahoon gar sair-e-chaman aankh dikhata hai mujhe

Shor-e-timsaal hai kis rashk-e-chaman ka ya rab Aaina baiza-e-bulbul nazar aata hai mujhe

Hairat-e-aaina anjaam-e-junoon hoon jiyoon shama Kis qadar daagh-e-jigar shola uthata hai mujhe

Main hoon aur hairat-e-javed magar zauq-e-khayaal Ba-fusoon-e-nigah-e-naaz satata hai mujhe

Hairat-e-fikr-e-sukhan saaz-e-salamat hai Asad Dil pas-e-zaanu-e-aaina bithata hai mujhe